ԱՄՆ-ից թավջութակահար Տիգրան Մարտիկյանը՝ «Իմ Հայաստան» համահայկական փառատոնում

ՀՀ սփյուռքի նախարարության «Իմ Հայաստան» համահայկական փառատոնի անհատ կատարողների օրերի շրջանակներում շարունակվում են համերգները, որտեղ իրենց մասնակցությունն են բերում աշխարհի տարբեր երկրներում կայացած, մեծ համբավ վայելող և ճանաչված հայազգի երաժիշտներ:

Այս մասին տեղեկացնում են ՀՀ սփյուռքի նախարարության լրատվական ծառայությունից:

Երևանյան համերգները լավագույն հնարավորություն են հայաստանյան հանդիսատեսի համար` ճանաչելու եւ գնահատելու Հայրենիքից դուրս ապրող և ստեղծագործող մեր հայրենակիցների աշխատանքները և ձեռքբերումները:

Սեպտեմբերի 11-ին, ժ.19:00 Կամերային երաժշտության տանը կկայանա ԱՄՆ-ից թավջութակահար Տիգրան Մարտիկյանի և Հայաստանից հայտնի ջազային կատարողների համատեղ համերգը:

Տեղեկացնենք, որ Տիգրան Մարտիկյանն կրթություն է ստացել Տիգրան Չուքաջյանի անվան երաժշտական դպրոցում, որտեղ 1980-1988թթ. սովորել է թավջութակի բաժնում: Դպրոցն ավարտելուց հետո 1991թ. ընդունվել է Լոս-Անջելեսի անվան Քոլեջ (LACC), այս անգամ` դաշնամուրի բաժին և երկու տարի անց շարունակել ուսումը USC (university of Southern California) համալսարանի` ջազային բաժնում:

Տիգրանն իր երաժշտական գործունեությունը սկսել է վաղ հասակից: 12 տարեկանում նա ակորդեոն էր նվագում` մասնակցելով մի շարք երաժշտական միջոցառումների:

Սովորելու ընթացքում արժանացել է բազմաթիվ պատվոգրերի և գովասանագրերի, այդ թվում նաև` լեգենդար ջազմեն Չիկ Կորեայի կողմից: Տիգրանը համերգներով հանդես է եկել ԱՄՆ-ում (այդ թվում Նյու-Յորքի Կարնեգի և Հոլ համերգասրահներում) և Եվրոպական մի շարք երկրներում:

Այժմ, Տիգրանը ապրում և աշխատում է Լոս-Անջելեսում: Նաև կոմպոզիտոր է: Տիգրանի գրած երաժշտությունը «Let's go Dance» կատարվել է Նյու-Յորքում:

Երաժշտություն է գրել մի շարք ամերիկյան կարճամետրաժ կինոնկարների համար: Այժմ աշխատում է նոր ջազային ձայնասկավառակի վրա, որը կկոչվի «My home town Armenia»: