Հայաստանի պետական ակադեմիական երգչախումբը ելույթ է ունեցել Մոսկվայում

Հայաստանի պետական ակադեմիական երգչախումբը (գեղարվեստական ղեկավար և գլխավոր դիրիժոր Հովհաննես Չեքիջյան) 10 տարվա ընդմիջումից հետո կրկին ելույթ է ունեցել Մոսկվայում, հայտնում է Культура հեռուստաալիքը:

Համերգը տեղի է ունեցել Մոսկվայի Կոնսերվատորիայի Մեծ համերգասրահում: Կոլեկտիվին նվագակցել է Մոսկվայի Սիմֆոնիկ նվագախումբը (խմբավար՝ Պավել Կագան):

Աղբյուրը նշում է, որ հայկական երգչախմբին համաշխարհային ճանաչում է բերել «հայ երգահան Կոմիտասի ստեղծագործությունների և հոգևոր երաժշտության կատարումը»:

Մոսկվայում, սակայն, Հայաստանի պետական ակադեմիական երգչախումբը կատարել է Շուբերտի, Բեթհովենի, Օրֆի, Վերդիի ստեղծագործությունները:

Համերգը նվիրվել է Հայկական ԽՍՀ մշակույթի նախկին նախարար, արտաքին գործերի նախկին նախարար, դիվանագետ Կամո Ուդումյանի 85-ամյակին, ով կնքել է իր մահկանացուն նախորդ տարի: