Սկսվել են Թբիլիսիի Սուրբ Գևորգ եկեղեցու վերականգնման ակտիվ աշխատանքները

Արդեն մի քանի օր է, ինչ մեկնարկել են Թբիլիսիի ամենահին՝ Սուրբ Գևորգ եկեղեցու վերականգնողական աշխատանքները. եկեղեցու տարածքն արդեն երեսպատված է, իսկ այսօր սկսվել են վերանորոգման ակտիվ աշխատանքները, Tert.am-ին այս մասին տեղեկացրեց Թբիլիսիի հայկական ասամբլեայի համակարգող, «Բազմազգ Վրաստան» հասարակական կազմակերպության նախագահ Առնոլդ Ստեփանյանը:

Նա նշեց, որ աշխատանքներն իրականացվում են հայերի ու վրացիների համատեղ ջանքերով: Հիմնականում եկեղեցու վրա աշխատում են հայեր՝ Հայաստանի ու Վրաստանի:

Հարցին, թե ով է հետևում, որ վերականգնողական աշխատանքների ընթացքում չտուժեն եկեղեցու ճարտարապետական առանձնահատկությունները, նա պատասխանեց, որ, նախևառաջ, դրան հետևում է եկեղեցին։

«Առաջին հերթին եկեղեցին է հետևում դրան, քանի որ նա առաջին հերթին է հետաքրքրված, որ չտուժի ճարտարապետությունը՝ եկեղեցու շենքի յուրահատկությունը: Աշխատանքներին հետևում են նաև հայկական հասարակական կազմակերպություններ»,-ասաց նա և ընդգծեց, որ եկեղեցու վերականգնողական աշխատանքների պլանը կազմելիս՝ մասնակցել են հայ ճարտարապետներ:

Առնոլդ Ստեփանյանը տեղեկացրեց, որ եկեղեցու վերականգնողական աշխատանքներն իրականացվում են Սուրբ Գևորգի վերականգնման բարեգործական հիմնադրամի ֆինանսավորմամբ:

«Գումարները հավաքվում են աշխարհի տարբեր ծայրերում գտնվող հայերի շնորհիվ՝, այսինքն` հայերն են ֆինանսավորում»,-ասաց նա:

Եկեղեցու վերականգնողական աշխատանքները նախատեսված է ավարտել 2 տարվա ընթացքում:

Սուրբ Գևորգ եկեղեցին կառուցվել է 1251 թ-ին մեծահարուստ հայ առևտրական Կարինցի Ումեկի կողմից, ով բնակություն է հաստատել Թիֆլիսում 13-րդ դարի սկզբներին:

Հետագայում եկեղեցին վերանորոգվել է 17-րդ դարում: Այն գտնվում է Վախթանգ Գորգասալի հրապարակի հարավ-արևմտյան անկյունում: Եկեղեցու դիմաց գտնվում է մեծ հայ բանաստեղծ Սայաթ-Նովայի գերեզմանը: