Եղանակն՝ այսօր
Սերժ Սարգսյանը դաշնակահար Եվգենի Կիսինին պարգևատրել է Պատվո շքանշանով
Նախագահ Սերժ Սարգսյանն այսօր հյուրընկալել է «Երևանյան հեռանկարներ» փառատոնի շրջանակներում մեր երկիր ժամանած աշխարհահռչակ դաշնակահար Եվգենի Կիսինին, ում ի նշան հայ ժողովրդի երախտագիտության,նախագահը պարգևատրել է Պատվո շքանշանով՝ հայ-ռուսական մշակութային կապերի ամրապնդման և զարգացման, ինչպես նաև Հայաստանում 1988թ. տեղի ունեցած աղետալի երկրաշարժից տուժածներին մարդասիրական օգնություն ցուցաբերելու գործում ներդրած նշանակալի ավանդի համար:
Ինչպես տեղեկացնում են նախագահական գրասենյակից, Սերժ Սարգսյանը ողջունել է տաղանդաշատ արվեստագետին և ընդգծել, որ Հայաստանում նրան ընդունում են որպես անկեղծ և մեծ բարեկամի, ով 1988-ի ավերիչ երկրաշարժից ի վեր մեր ժողովրդի կողքին է: Հայ ժողովուրդը, նրա խոսքով, երախտապարտ է իր բոլոր բարեկամներին, այդ թվում՝ Եվգենի Կիսինին և մշտապես ուրախ է հյուրընկալել նրանց Հայաստանում:
Սերժ Սարգսյանը նշել է, որ տաղանդավոր մարդիկ նաև մեծ ավանդ են ունենում ժողովուրդների բարեկամության ամրապնդման գործում:
Եվգենի Կիսինը շնորհակալություն է հայտնել Նախագահին՝ բարձր պարգևի և ջերմ խոսքերի համար: Նա նաև շնորհակալություն է հայտնել «Երևանյան հեռանկարներ» փառատոնի կազմակերպիչներին ու աջակիցներին՝ ընդգծելով, որ աշխարհի հեղինակավոր մենակատարների և նվագախմբերի ունկնդրած երևանյան հանդիսատեսը, իրոք, արժանի է լավագույն երաժշտության:
Studio One