Նյու Յորքում կբացվի Ջոն Լենոնի նկարների ցուցահանդեսը

Բրիտանական լեգենդար «Բիթլզ» խմբի հիմնադիր Ջոն Լենոնի քիչ հայտնի ստեղծագործական կողմի հետ հանրությանը կծանոթացնի «Ջոն Լենոնի գեղարվեստական ստեղծագործությունը» նկարների ցուցահանդեսը, որը կբացվի այս շաբաթ Նյու Յորքում, հայտնում է «ԻՏԱՌ ՏԱՍՍ»-ը։

Ինչպես հայտնում են ամերիկյան ԶԼՄ-ները, ցուցադրությունը նվիրված է հայտնի երաժշտի ծննդյան 72-ամյակին։

Կներկայացվի մոտավորապես 100 նկար, ծաղրանկարներ և կոմիքսներ, որոնք Լենոնը նկարել է 1964-1980թթ.։ Ցուցահանդեսի կազմակերպիչներից է նաև երգչի այրին՝ Յոկո Օնոն։ Աշխատանքների մի մասը նախկինում երբևէ չի ներկայացվել հանրությանը։

Ցուցահանդեսը կկայանա հոկտեմբերի 5-9-ը, Նյու Յորքի Open House պատկերասրահում։ Մուտքն անվճար է, սակայն նվիրատվությունները ողջունելի են։ Բոլոր հավաքված միջոցները կուղղվեն քաղաքի անօթևաններին և անապահով քաղաքացիներին տաք սննդով ապահովող բարեգործական կազմակերպությանը։