Եղանակն՝ այսօր
Հայաստանի ունեցած միակ ռեսուրսը ուղեղն է, որը պետք է ճիշտ օգտագործել ու ճիշտ արտահանել. Արեգ Միքայելյան
Հայկական աստղագիտական ընկերության համանախագահ Արեգ Միքայելյանն, այսօր լրագրողների հետ հանդիպմանը, խոսելով ուղեղների արտահոսքի մասին, կարծիք հայտնեց, որ Հայաստանի ունեցած միակ ռեսուրսը ուղեղն է, որը ճիշտ պետք է կարողանալ օգտագործել ու նաև ճիշտ ձևով արտահանել:
«Նախորդ տարի մեր ունեցած տվյալներով Հայաստանից գնացել է 36 մտավորական, ուսանողներ, որոնցից շատ քչերն են վերադարձել: Ուղեղների արտահոսքի պատճառ կարող է դառնալ որակյալ կադրերի ոչ նպատակային օգտագործումը, քանի որ նրանցից շատերը գնում են արտասահման ավելի ցածր աշխատանք անելու, բայց ավելի բարձր աշխատավարձով»,- ասաց Արեգ Միքայելյանը:
Բանախոսի կարծիքով ուղեղների արտահոսքը կանխելու համար պետական քաղաքականությունը պետք է այնպես վարել, որ տեղում գնահատվեն որակյալ կադրերը, ջանքեր գործադրվեն նրանց պահելու համար:
«Մարդիկ ինքնադրսևորվելու համար այլ երկրներ են գնում, քանի որ Հայաստանում չեն կարողանում աշխատանք գտնել: Ոչ մի ուրիշ գործոն չի կարող ավելի լավ ապահովել պետության կայունությունը, քան մարդկային ռեսուրսը»,- ասաց Արեգ Միքայելյանը:
Հայկական աստղագիտական ընկերության համանախագահի կարծիքով, բացի այն, որ մեր երկրում չենք ապահովում նորմալ աշխատատեղեր, Հայաստանում նույնիսկ բացակայում է կոորդինացված քաղաքականությունը, թե տարեկան քանի մասնագետ ենք պատրաստում:
«Բուհեր ավարտած երիտասարդները հաճախ ավելցուկ են տալիս, քանի որ աշխատատեղ չկա, կա նաև դրա հակառակ երևույթը, երբ մասնագետի պակաս է լինում: Մարդկանց նկատմամբ հոգ տանող չկա, դրա համար այդ մարդը մնում է իր բախտի քմահաճույքին, և առանց նորմալ հրավերի հենց այնպես գնում են ուրիշ երկիր` տեսնեն ինչ կստացվի: Եվ մեծ մասամբ նրանք շատ վատ արդյունքների են հասնում»,- ասաց Արեգ Միքայելյանը:
Ուղեղների արտահոսքի միակ դրական կողմը բանախոսը առանձնացրեց այն, որ եթե մտավոր աշխատանքի մեկնողները վերադառնան Հայաստան, իրենց հետ կբերեն «ավելի շատ ուղեղ»:
Studio One