WhatsApp-ը կդառնա վճարովի

WhatsApp Messenger հավելվածը, որը թույլ է տալիս փոխանակվել ակնթարթային հաղորդագրություններով 3G/EDCE և Wi-Fi ցանցերում, կդառնա վճարովի, հայտնում է Газета-ն՝ վկայակոչելով The Standard-ին։

Հավելվածի ստեղծողը սկսել է տեղեկացնել Հոնկոնգի՝ Android բջջային պլատֆորմով սմարթֆոնների օգտատերերին, որ նրանք պետք է յուրաքանչյուր տարի 99 ցենտ վճարեն, եթե ցանկանում են շարունակել աշխատանքը հավելվածի հետ։ Blackberry-ի, Windows պլատֆորմով սմարթֆոնների և Nokia հեռախոսների օգտատերերը նույնպես պետք է վճարեն յուրաքանչյուր տարի։

iPhone-ից օգտվողները, սակայն, կվճարեն միայն մեկ անգամ, այնուհետև օգտատերերը կարող են ներբեռնել հավելվածն անսահմանափակ քանակով։

WhatsApp-ը, որը թույլ է տալիս փոխանակվել անվճար տեքստային հաղորդագրություններով, երկար ժամանակ ամենաշատ ներբեռնվող հավելվածն էր։

Android-ով սմարթֆոնների շատ օգտատերեր այս քայլը խտրական են համարել։

Հավելվածի ստեղծողներ Բրայան Էկտոնն ու Յան Կոումն իրենց բլոգում գրել են, որ վճար են գանձում օգտատերերից, քանի որ չեն ցանկանում գովազդ վաճառել։