Հայոց ցեղասպանության թանգարանը համալրվել է Թուրքիայի իրական սահմանները պատկերող քարտեզներով (լուսանկարներ)

Հայոց ցեղասպանության թանգարան-ինստիտուտի հավաքածուն համալրվել է քարտեզագրական նոր նյութերով, որոնք թողարկվել են 1920-ականների առաջին կեսին Ամերիկայում և Եվրոպայում: Այս մասին տեղեկացնում ենք թանգարան-ինստիտուտի կայքէջից:

Նույն հաղորդագրության մեջ նշվում է, որ Ամերիկյան, գերմանական, բրիտանական քարտեզագրական այս նյութերը մեծ հետաքրքրություն են ներկայացնում, քանի որ դրանցում առկա են նաև արդեն Հանրապետական հռչակված Թուրքիայի սահմանները: Ըստ այդմ, Թուրքիայի արևելյան սահմանն անցնում է այն սահմանագծով, որը հաստատվել էր ԱՄՆ 28-րդ նախագահ Վուդրո Վիլսոնի (1856-1924թթ.) իրավարար վճռով:

Քարտեզագրական այս նյութերը լավագույն վկայությունն են այն բանի, որ նույնիսկ Հայաստանի Հանրապետության խորհրդայնացումից և Թուրքիայի Հանրապետության հռչակումից հետո Հայաստանի և Թուրքիայի սահմանագիծը համարվել է 1920թ. նոյեմբերին ԱՄՆ նախագահի կողմից հաստատված սահմանագիծը, որը միջազգային որևէ համաձայնագրով չի ենթարկվել փոփոխության և չեղյալ չի համարվել: