Եղանակն՝ այսօր
«Հայկական սոխակը» այսօր կդառնար 89 տարեկան. Ճապոնիայում նրա կոշիկներն էին գողանում, իսկ Երևանում նրա անվան փողոց էլ չկա
Օպերային արվեստի մեծագույն վարպետ, ժողովրդի մեջ «հայկական սոխակ» անունը ստացած երգչուհի Գոհար Գասպարյանը այսօր կդառնար 89 տարեկան: Գոհար Գասպարյանի ուսանողուհիներից Օլգա Զախարյանը Tert.am-ի հետ զրույցում պատմեց, որ ինքն իր մի շարք ձեռքբերումների համար պարտական է հենց «հայկական սոխակին»:
«Նա ամեն ինչ էր ինձ համար, նրա շնորհիվ ես ընդունվեցի օպերային թատրոն, նրա շնորհիվ ես կատարում էի բոլոր առաջնորդող դերերը, նրա շնորհիվ ես այսօր Կոնսերվատորիայի պրոֆեսորներից եմ: Նա ոչ միայն մեծագույն երգչուհի էր, այլ նաև մեծագույն մարդ: Ես հաճախ եմ նրան մինչև արցունքներս հիշում»,- ասաց նա և զարմանալի համարեց, որ մինչ օրս երգչուհու անվան փողոց չկա, նրա անվան տուն-թանգարան չի կառուցվել և առաջիկայում նման ծրագիր չկա:
Օլգա Զախարյանն ընդգծեց, որ Գոհար Գասպարյանի անունը ժամանակին թնդում էր ողջ աշխարհում, քանի որ ձայնային եզակի տվյալներ ուներ:
«Նրա ձայնը, յուրահատուկ տեմբր, քնարակոլորատուրային սոպրանո էր, ամենավերևի նոտաները նա այնքան պարզ էր կատարում, հանգիստ: Անմոռանալի են այն պահերը, երբ դասի ընթացքում ինքը անձամբ երգում էր ու սովորեցնում ճիշտ երգել, ցույց էր տալիս իր վարպետությունը: Նա միայնակ կարողանում էր մի ամբողջ ներկայացման պատկեր ստեղծել: Նրա նման տաղանդները ծնվում են 100 տարին մեկ անգամ, բայց կարծում եմ, որ Գոհար Գասպարյանի նմանը չի կրկնվի»,- ասաց նա:
Օլգա Զախարյանը պատմեց, որ երգչուհին Ճապոնիայում այնքան է սիրվել, որ հյուրախաղերի ժամանակ երկրպագուները պարբերաբար գողացել են նրա կոշիկները:
«Ճապոնիայում ընդունված է տուն ներս մտնելուց առաջ կոշիկները հանել: Նա էլ ամեն անգամ հանել է ու հետո տեսել, որ կոշիկները չկան: Նրան այնտեղ միանգամից սիրեցին և նրա շնորհիվ իմացան Հայաստանի մասին»,- ասաց նա:
Օլգա Զախարյանը հիշեց, որ իր սիրելի դասախոսը նաև լավ խոհարար ու դերձակ էր:
«Նա շատ համեղ էր պատրաստում, հատկապես՝ պասուց տոլմա, փախլավա, եգիպտական համեղ ուտեստներ, շատ հրաշալի էր նրա անուշապուրը, դա մի հրաշալի ուտեստ էր, քյուֆթան: Շատ լավ էր գործում, նստում էր բազմոցի մեջ ու սկսում էր գործել, իր բոլոր բեմական հագուստները ինքն իր ձեռքով էր կարում»,- ասաց նա:
Studio One