Մոսկվայում բացվել է Փարաջանովի «Նռան գույնը» ցուցադրությունը (լուսանկարներ)

Մոսկվայի Սոլյանկա փողոցում գտնվող պատկերասրահում բացվել է հայտնի ռեժիսոր Սերգեյ Փարաջանովի 90-ամյակին նվիրված «Նռան գույնը» ցուցադրությունը, որտեղ կարելի է տեսնել նրա ֆիլմերն ու ձեռքի աշխատանքները, հայտնում է РИА Новости-ն։

«Այս ցուցադրության յուրահատկությունն այն է, որ այստեղ ներկայացված են ոչ միայն իրեր, որոնք կապված են Փարաջանովի կյանքի և արվեստի հետ։ Սա նաև ժամանակակից նկարիչ Կատի Բոչավարի հայացքն է ռեժիսորի աշխատանքին և գեղարվեստական տարածքին, որը կապված է այլ մարդկանց հետ, նրա ավանդույթները շարունակողների հետ»,- պատմել է ցուցադրության կուրատոր Վյաչեսլավ Շմիրովը։

Ներկայացված է ավելի քան 30 նմուշից բաղկացած հավաքածուն, որը բերվել է Երևանում Փարաջանովի տուն-թանգարանից և մինչ օրս երբեք չի ցուցադրվել Մոսկվայում։ Կցուցադրվեն նաև ֆիլմեր։

Ցուցադրությունը բաց կլինի մինչև մարտի 16-ը։