Հոլոքոստի զոհերն ու նրանց ժառանգները պահանջում են հրապարակել Գուրլիտի ամբողջ ցուցակը

Jewish Claims Conference կազմակերպությունը, որը ներկայացնում է Հոլոքոստից տուժած հրեաներին և նրանց ժառանգներին, կոչ է արել հրապարակել գերմանացի հավաքորդ Կորնելիուս Գուրլիտի ավստրիական տանը հայտնաբերված արվեստի գործերի ամբողջական ցուցակը՝ օրինական սեփականատերերին և նրանց ժառանգներին որոնելու համար, հայտնում է newsru.com-ը՝ վկայակոչելով BBC-ին։

Գերմանիայում կազմակերպության ներկայացուցիչը պնդում է, որ քանզի Գուրլիտն այն 4 արտ-դիլերներից մեկի որդին է, «ում Հիտլերն ընտրել էր գողացված արվեստի գործերի վաճառքն իրականացնելու համար, անհրաժեշտ է մանրակրկիտ ստուգել նրա մոտ գտնվող հավաքածուի ծագումը»։

«Հոլոքոստի զոհերը և նրանց ժառանգներն ունեն դրա իրավունքը»,- ընդգծել է կազմակերպության ներկայացուցիչը։

Սակայն Գուրլիտի ներկայացուցիչը մերժել է այդ պահանջը։ Նրա խոսքով՝ նախնական փորձաքննությունը ցույց է տվել, որ հավաքածուից ոչ մի աշխատանք չի գողացվել կամ առգրավել նացիստների կողմից։ «Դա մասնավոր հավաքածու է։ Եթե հետևել այդ տրամաբանությանը, ապա պետք է հրապարակել Գերմանիայի տարածքում գտնվող բոլոր գեղարվեստական հավաքածուների ցուցակները»,- նշել է ներկայացուցիչը։

Հիշեցնենք, որ նախորդ շաբաթ Գուրլիտի տանը մի քանի տասնյակ կտավներ էին հայտնաբերվել։ 81-ամյա Գուրլիտի ներկայացուցիչները հայտնել էին, որ փորձագետներն այժմ ուսումնասիրում են 60 կտավ՝ հասկանալու համար, թե արդյոք նկարները գողացվել են նացիզմի տարիներին։