Բրիտանացին հնոտիների շուկայում 33 մլն դոլար արժողությամբ Ֆաբերժեի ձու է հայտնաբերել (լուսանկարներ)

Մետաղի ջարդոնի առքուվաճառքով զբաղվող բրիտանացին, ում անունը չի նշվում, հնոտիների շուկայում հայտնաբերել է հետաքրքիր ոսկե ձու, որը որոշել է գնել՝ վճարելով 13.300 դոլար։ Սակայն ձուն գնելու պահին նա անգամ պատկերացում էլ չի ունեցել, թե ինչպիսի հազվագյուտ թանկարժեք նմուշ է իր ձեռքում։

Ինչպես նշում է Daily Mail-ը, սկզբում նրան չի հաջողվել ձուն վաճառել, քանի որ գնորդների կարծիքով՝ դրա գինը չափազանցված է եղել։ Սակայն երբ նմուշն ուսումնասիրել է փորձագետը, ապա պարզվել է, որ դա 33 մլն դոլար արժողությամբ Ֆաբերժեի ձու է, որը ստեղծվել է ռուսական Ռոմանովների կայսերական ընտանիքի համար։

Աղբյուրը նշում է, որ նորահայտ նմուշն այն 50 ձվերից մեկն է, որ ֆրանսիացի ոսկերիչ Կառլ Ֆաբերժեն ստեղծել է Ռոմանովների համար։

Դրանում ներդրված է Vacheron Constantin շվեյցարական ժամացույց, որը կայսր Ալեքսանդր 3-րդը Սուրբ Ծննդի կապակցությամբ նվիրել էր իր կնոջը՝ կայսրուհի Մարիա Ֆյոդորովնային՝ 1887թ.։

Նմուշը վերջին անգամ ցուցադրվել է 1902թ.՝ Սանկտ Պետերբուրգում, իսկ հեղափոխությունից հետո բոլոր ձվերն առգրավել են բոլշևիկները՝ վաճառելով դրանք Արևմուտքին։ Ձուն ապրիլի 14-17-ը կցուցադրվի Լոնդոնում։