Եղանակն՝ այսօր
Ճանաչենք, նմանվենք. մեծարման միջոցառում՝ նվիրված գեներալ Դալիբալթայանին (տեսանյութ)
Մայիսյան հաղթանակներին ընդառաջ Երևանի թիվ 181 ընդհանուր դպրոցում այսօր տեղի ունեցավ Շուշիի ազատագրման մասնակից, ծնունդով ջավախեցի գեներալ Գուրգեն Դալիբալթայանին նվիրված մեծարման միջոցառում:
Միջոցառման ժամանակ հանրությանը ներկայացվեց նաև գեներալին նվիրված «Կաթիլք» բանաստեղծությունների ժողովածուն, որի հեղինակը նույնպես ծնունդով ջավախեցի Խանում Եղոյանն է:
«Մինչև ուզեցի…
Մինչև ուզեցի ապրել,
Մինչև ուզեցի ապրել առանց Արմատի,
Մինչև ուզեցի ապրել առանց Արմատիս, ցավի ու խնդիր,
Արևն արդեն թռել էր…
Արևն արդեն թռել էր երդիկիցս»:
Երևանի թիվ 181 ընդհանուր դպրոցի հայոց լեզվի և գրականության ուսուցիչ Խանում Եղոյանի բանաստեղծությունից մի հատված է՝ նվիրված Հայոց բանակի նահապետին՝ Գուրգեն Դալիբալթայանին:
«Նրանցով ճանաչենք ինքներս մեզ, նմանվենք մեր գեներալներին, ճանաչենք, նմանվենք, մեծարենք»,-իր սաներին խորհուրդ տվեց Խանում Եղոյանը:
Մեծարման միջոցառմանը ներկա էր նաև պատմաբան Աշոտ Մելքոնյանը: «Իր ծննդավայրը սիրելով՝ նա չէր կարող իր մեծ երկիրը չսիրել: Մենք սիրում ենք մեր փոքրիկ հայրենիք Ջավախքը, այդ համահայկական սիրո և մտածողության մղումի առկայությունն այս պատանիների մոտ պետք է արմատավորվի»,-ասաց նա:
Նշենք, որ միջոցառմանը նախապես պլանավորված էր, որ ներկա կլինի նաև գեներալը, սակայն առողջական խնդիրների պատճառով չէր կարողացել ներկա լինել: Եվ, ինչպես դպրոցի տնօրենը փոխանցեց, նախատեսում են միջոցառումը կրկնել:
Studio One