Նրան ասում էին ծիծաղի թագուհի. դերասանուհի Սվետլանա Գրիգորյանին ծափերով հրաժեշտ տվեցին (լուսանկարներ, տեսանյութ)

Հ. Պարոնյանի անվան երաժշտական կոմեդիայի թատրոնի շենքում այսօր հազարավոր երկրպագուներ վերջին հրաժեշտը տալու էին եկել ՀՍՍՀ ժողովրդական արտիստ, Հ. Պարոնյանի անվան երաժշտական կոմեդիայի թատրոնի դերասանուհի Սվետլանա Գրիգորյանին:

«Շատ թանկ մարդ էր Սվետլանան մեզ համար: Նրան ասում էին ծիծաղի թագուհի, դա իրոք այդպես էր: Ես հիշում եմ, որ մարդիկ դահլիճից հեռանում էին, դեռ երկար ժամանակ իրենց ժպիտը դեմքերին էր: 60 տարի շարունակ նա ցատկոտել է այս բեմի վրա: Նա երեխաներ, ամուսին չուներ, ամբողջովին տրվել է բեմին…»,- իր հրաժեշտի խոսքում ասաց ԽՍՀՄ ժողովրդական արտիստուհի Վարդուհի Վարդերեսյանը:

Դրամատուրգ, հրապարակախոս Կարինե Խոդիկյանը Tert.am-ի հետ զրույցում ասաց, թե թատրոնից հեռացավ մեր ամենաբարի, ամենաանկեղծ, ամենաիսկական ծիծաղը:

«Նա այնքան լավ էր տիրապետում ժպիտի ու ծիծաղի վարպետությանը, որ այսօր նրա հրաժեշտում և՛ ցավ կա, և՛ մեզանից անկախ ծիծաղում ենք: Նա մեր ցավի հետ մեկտեղ պետք է տեսնի մեր ժպիտը»,- նշեց դրամատուրգը:

ՀՀ արվեստի վաստակավոր գործիչ Վիգեն Ստեփանյանն էլ ասաց, թե հները գնում են, և դա շատ ցավալի է:

«Պայծառ մարդ կորցրեցինք, կին, որի ներկայությամբ նույնիսկ ամենավատ տրամադրության դեպքում հնարավոր չէր տխուր մնալ: Այն մթնոլորտը, որ նա կարողանում էր ստեղծել իր շուրջը՝ և՛ ստեղծագործական էր, և՛ ուրախ, և՛ պրոֆեսիոնալ»,- փոխանցեց Վիգեն Ստեփանյանը:

Գ. Սունդուկյանի անվան թատրոնի դերասան Ռազմիկ Խոսրոևի խոսքով՝ երջանիկ է այդպիսի արտիստուհի ունեցող ժողովուրդը, որովհետև նա ժողովրդինն էր, ժողովուրդն էլ՝ իրենը:

«Սվետլանա Գրիգորյանը մեր ժամանակի լավագույն դերասանուհի լինելուց բացի, վերջին 45-50 տարիներին Կարպ Խաչվանքյանի հետ կարողացավ պահել այս թատրոնը: Ցավալի է, որ նա այսօր մեզ հետ չէ, նա կգնա, կհավասարվի հավերժությանը՝ ինչպես մեր մյուս մեծերը»,- նշեց դերասանը: