Մայդանի գլխավոր խնդիրն իրականացված է, բարիկադները կհավաքվեն. Կլիչկո

14:42 • 26.05.14

Նախնական տվյալների համաձայն՝ Կիևի քաղաքապետի ընտրություններում հաղթանակ տարած Վիտալի Կլիչկոն հայտարարել է, որ Մայդանից բարիկադներն աստիճանաբար կհավաքեն, քանի որ դրանք կատարել են իրենց գործառույթը: Այդ մասին նա հայտարարել է այսօր Կիևում մամուլի ասուլիսի ժամանակ, գրում է ZN.UA-ն:

 

«Ես համոզված եմ, որ Մայդանի գլխավոր խնդիրն իրականացվել է: Այսօրվա դրությամբ մենք ազատվել ենք բռնապետից, իրականացրել ենք իշխանության լյուստրացիա… Ես համոզված եմ, որ մեր առջև եղած ամենակարևոր խնդիրներից մեկը չմոռանալն է այն մարդկանց, որոնք կանգնել են Մայդանում: Մեր երկրի ժողովրդավարական ապագայի համար պայքարում մահացածների հիշատակին հուշարձան ստեղծելու նախաձեռնությունը պետք է աջակցություն ստանա: Ես համոզված եմ, որ բարիկադներն այսօրվա դրությամբ կատարել են իրենց գործառույթը, և դրանք պետք է հավաքել»,- ասել է Կլիչկոն:

 

Նրա խոսքով՝ Կիևը պետք է աստիճանաբար վերադառնա բնականոն կյանքի, ինչն օրինակ կլինի նաև Ուկրաինայի մյուս շրջանների համար, որտեղ այժմ բարիկադներ են կառուցվում:

 

Կիևի քաղաքապետարանն ավելի վաղ հայտարարել էր, որ մտադիր է մայրաքաղաքի կենտրոնական հրապարակը դարձնել զոհերի հիշատակին նվիրված վայր, իսկ ամանորյա տոնածառը տեղադրել այլ վայրում: