Հայկական մշակույթի օրեր՝ Իսրայելում

Երկկողմ միջպետական համաձայնագրերով և Երուսաղեմի սփյուռքի նախարար Նաֆթալի Բենեթի հրավերով 2014 թ. հուլիս 7-14-ը Իսրայելում կկայանան հայ մշակույթի օրեր: Այս մասին հաղորդում է Մշակույթի նախարարության պաշտոնական կայքը:

Մշակույթի օրերի ծրագրով նախատեսվում են «Բարեկամություն» Հայաստանի պարարվեստի պետական համույթի, «Կադանս» երաժշտական անսամբլի, Ինգա և Անուշ Արշակյանների համերգները Թել Ավիվում և Հայֆայում, նաև կբացվի հայ պատմամշակութային ժառանգությանը նվիրված լուսանկարչական և ձեռագործ աշխատանքների (բատիկա) ցուցահանդեսը:

Մշակույթի օրերի ընթացքում «Բարեկամություն» Հայաստանի պարարվեստի պետական համույթը Իսրայելի Կարմիել քաղաքում կմասնակցի միջազգային փառատոնի:

Այցի ընթացքում ՀՀ մշակույթի նախարար Հասմիկ Պողոսյանի գլխավորած պաշտոնական պատվիրակությունը հանդիպումներ կունենա Իսրայելի Կնեսետի խոսնակ Իոել Էդելշտեյնի, Կնեսետի պատգամավորների, Իսրայելի արտաքին գործերի նախարարի տեղակալի, Իսրայելի մշակույթի և սպորտի նախարար Լիմոր Լիվնատի, Թել Ավիվի և Նազարեթի քաղաքապետերի հետ:

Պաշտոնական հանդիպումներին կմասնակցեն նաև Իսրայելում Հայաստանի Հանրապետության արտակարգ և լիազոր դեսպան Արմեն Մելքոնյանը (նստավայրը` Կահիրե) և Իսրայելում Հայաստանի Հանրապետության պատվավոր հյուպատոս Ցոլակ Մոմջյանը:

Նախատեսվում է այցելություն Երուսաղեմի Հայոց պատրիարքարան և հանդիպում հայ համայնքի հետ:
Հանդիպումների ժամանակ կքննարկվեն հայ-իսրայելական մշակութային համագործակցության ապագա ծրագրերը, կնախանշվեն ոլորտային համագործակցության նոր ուղղությունները և կհստակեցվեն 2015 թ. երկկողմ համագործակցության ծրագրերը: