Թուրք ռեժիսորը Հնչակյան հեղափոխականների մասին ֆիլմ է նկարում

Սոցիալ Դեմոկրատ Հնչակյան կուսակցության Երևանի Ստեփան Սապպահգյուլ կենտրոնական գրասենյակում հուլիսի 16-ին ՍԴՀԿ ԿՎ անդամ Գևորգ Պերկուպերկյանը, ՍԴՀԿ Հայաստանի վարչության փոխատենապետ Վազգեն Մեսրոպյանը, վարչության անդամ Գագիկ Մելիքյանն ու ՍԴՀԿ «Սարգիս Տխրունի» ուսանողական-երիտասարդական միության ատենապետ Վարազդատ Փանոյանը հանդիպել են թուրք ռեժիսոր, Թուրքիայի Վերակազմյալ սոցիալիստական կուսակցության վարչության անդամ Քադիր Աքընի և հասարակական գործիչ Սարգիս Հացպանյանի հետ:

Ինչպես տեղեկացնում է ՍԴՀԿ մամուլի դիվանը, թուրք ռեժիսորը Հայաստանում է գտնվում «Ոսկե Ծիրան» միջազգային կինոփառատոնի շրջանակներում և պատրաստվում է ֆիլմ նկարել 20-րդ դարի սկզբին Արևմտահայաստանի ամենահայտնի հեղափոխական գործիչներից մեկի՝ հնչակյան գործիչ Փարամազի (Մաթեոս Սարգսյանի) մասին: Ֆիլմը կոչվում է «Անատոլիայի հեղափոխական գործիչ Փարամազը»:


Թուրք ռեժիսորը շնորհակալություն է հայտնել Հնչակյան կուսակցության ներկայացուցիչներին՝ Փարամազի մասին տրամադրած տեղեկությունների և վավերագրական փաստերի համար: Իրենց հերթին ՍԴՀԿ ներկայացուցիչները նշել են Թուրքիայում Փարամազի և նրա ընկերների հեղափոխական գործունեության լուսաբանման կարևորությունն ու այս հարցում ընդգծել նաև թուրք ռեժիսորի գործունեության կարևորությունը: ՍԴՀԿ ներկայացուցիչները նաև ընդգծել են Ցեղասպանության 100-րդ տարելիցին ընդառաջ նման ֆիլմի ստեղծման կարևորությունը:

Լուսանկարում՝ Հնչակյան հեղափոխական գործիչ, Կ. Պոլսի Սուլթան Բայազիտ հրապարակում 1915 թ-ի հունիսի 15-ին կախաղան բարձրացված Փարամազը (Մաթեոս Սարգսյան): Վերջինս և նրա 19 հնչակյան ընկերները մահվան դատապարտվեցին իթթիհատական Թուրքիայի ղեկավարներ, Հայոց ցեղասպանության կազմակերպիչներ Էնվերի, Ջեմալի և Թալեաթի դեմ մահափորձ կազմակերպելու համար: