Ողջ Ռուսաստանի տարածքում պահեստայինների հավաք է անցկացվում

11:38 • 01.08.14

Ռուսաստանի պաշտպանության նախարարությունը հայտարարել է օգոստոս-հոկտեմբեր ամիսներին բոլոր ռազմական շրջաններում պահեստայինների հավաքի մասին, տեղեկացնում է РИА Новости գործակալությունը:

 

«Հիմնական ռազմական մասնագիտությունների գծով պատրաստումը տեղի կունենա երկու ամսվա ընթացքում՝ զորամասերում և ստորաբաժանումներում»,-հաղորդել է ռազմական գերատեսչությունը:

 

Նշված ռազմական մասնագիտությունների թվում են կապի, հրթիռային և հրետանային զորքերի, մոտոհրաձգային ստորաբաժանումների, ռազմածովային նավատորմի առափնյա ծառայության, երկաթուղային և ինժեներական ստորաբաժանումների, ինչպես նաև նյութատեխնիկական սպասարկման ստորաբաժանումների պահեստայինները:

 

Նրանք պետք է ծանոթանան նոր, արդիականացված զենքերին, ռազմական և հատուկ տեխնիկային: Ուսումնական վարժանքները տեղի են ունենալու նաև հրամանատարաշտաբային «Վոստոկ-2014» զորավարժությունների ընթացքում:

 

Հավաքների մասնակիցներն իրավունք են ունենալու ստանալ զինվորական կոչման և պաշտոնի համար դրամական վճարումներ, նրանց վճարվելու են նաև գործուղումային ծախսերը, տրամադրվելու է անվճար բուժօգնություն:

 

Պաշտպանության նախարարությունում ընդգծում են, որ այդ միջոցառումը պլանավորվել էր դեռևս անցյալ նոյեմբերին: