Վանո Սիրադեղյանի «Գառ-ախպերիկ» պատմվածքի հիման վրա նկարահանված «Կաթնեղբայր» ֆիլմը կցուցադրվի այսօր

Երևանի կենդանաբանական այգում մեկնարկում է «Ոսկե ծիրան» միջազգային կինոփառատոնի հաղթող ֆիլմերի ցուցադրությունների շարքը: Այս մասին տեղեկացնում է Երևանի կենդանաբանական այգու հասարակայնության հետ կապերի ղեկավարը։

«Ոսկե Ծիրան» միջազգային կինոփառատոնի հաղթող ֆիլմերի բացօթյա ցուցադրությունը Երևանի կենդանաբանական այգում իրականացնում է Վայրի բնության և մշակութային արժեքների պահպանման հիմնադրամը: Օգոստոսի 8-ին՝ ժ. 20:30, Երևանի կենդանաբանական այգում տեղի կունենա «Կաթնեղբայր» ֆիլմի ցուցադրությունը:

«Կաթնեղբայրը» Ոսկե Ծիրան միջազգային կինոփառատոնի Հայկական համայնապատկեր ծրագրում Լավագույն կարճամետրաժ խաղարկային ֆիլմ ճանաչվեց:

Մուտքն ազատ է:

Ֆիլմը պատմում է տասը տարեկան Սեթոյի մասին, որ ընտանիքի հետ ապրում է փոքր գյուղում: Տղան անհամբեր սպասում է եղբոր մոտալուտ ծննդին: Սեթոն սպիտակ թաշկինակներ է կապում ծառի ճյուղերին՝ հավատալով, թե դա կարագացնի մանկան գալուստը: Դժբախտաբար, նորածինը մահանում է:

Փոխարենը մի նորածին գառ է սկսում ապրել ընտանիքում և կերակրվում է Սեթոյի մոր կրծքից:

Ֆիլմի սցենարը գրվել է Վանո Սիրադեղյանի «Գառ-ախպերիկ» պատմվածքի հիման վրա:

Ռեժիսոր՝ Վահրամ Մխիթարյան, սցենարը՝ Վահրամ Մխիթարյանի, Ալեքսանդրա Մայջինսկայի։