Մահացել է դերասան Ռոբին Ուիլյամսը

Ամերիկացի դերասան Ռոբին Ուիլյամսին մահացած են գտել ԱՄՆ-ի Կալիֆոռնիա նահանգի Տիբերոն քաղաքում գտնվող սեփական տանը, գրում է lenta.ru-ն: Ոստիկանության համաձայն՝ «Օսկար»-ի 63-ամյա մրցանակակիրն ինքնասպան է եղել:

Ողբերգությունը տեղի է ունեցել երկուշաբթի՝ օգոստոսի 11-ին՝ ժամը մոտ 11:20-ին: Շրջանի շերիֆը հայտարարել է, որ Ուիլյամսի մահվան ենթադրյալ պատճառ է դարձել ասֆիքսիան (շնչահեղձությունը): Նա հավելել է, որ որպես հիմնական վարկած ոստիկանությունում դիտարկում են ինքնասպանությունը, սակայն մահվան վերջնական պատճառը կհաստատվի միայն դատաբժշկական փորձաքննությունից հետո:

«Այսօր առավոտյան Ռոբին Ուիլյամսը հեռացել է կյանքից: Վերջին ժամանակներում նա պայքարում էր ծանր դեպրեսիայի դեմ: Սա մեզ համար շատ անսպասելի կորուստ է: Բարեկամներն ու մերձավորները խնդրում են հարգանք ցուցաբերել իրենց անձնական կյանքի նկատմամբ այս բարդ շրջանում»,- ասել է դերասանի ներկայացուցիչ Մարու Բուքսբաումը:

Ռոբին Ուիլյամսն «Օսկար»-ի և 4 «Ոսկե գլոբուսի» մրցանակակիր է: Դերասանն Ամերիկյան կինոակադեմիայի մրցանակի՝ «Օսկար»-ի է արժանացել «Խելոք Ուիլ Հանթինգը» ֆիլմում երկրորդ պլանի դերի համար: Ուիլյամսը խաղացել է մոտ 300 ֆիլմերում: