Ռոբին Ուիլյամսի վերջին տեսանյութերից մեկն ուղղված է եղել անբուժելի հիվանդ մի աղջկա (լուսանկարներ, տեսանյութ)

Ինքնասպանությունից ամիսներ առաջ հոլիվուդյան դերասան Ռոբին Ուիլյամսը ձայնագրել է իր վերջին տեսաուղերձներից մեկը, որն աջակցության և սիրո խոսքեր է պարունակում՝ ուղղված անբուժելի հիվանդ մի աղջկա, գրում է РИА Новости-ն։

Երբ 21-ամյա Վիվիան Ուելերի մոտ ախտորոշվում է աղիքային, թոքերի և երիկամի քաղցկեղ, նա իր «վերջին գործերի ցուցակում» նշում է հանդիպում Ուիլյամսի հետ և հույս հայտնում անձամբ հանդիպել նրա հետ։

Սակայն նրա վիճակը վատանում է, և նա չի կարողանում Նոր Զելանդիայից մեկնել Ամերիկա։ Ընկերները որոշում են օգնել նրան և կապվում են 63-ամյա դերասանի հետ, վերջինս համաձայնում է կարճ տեսաուղերձ ձայնագրել։

«Ողջույն, Վիվիան։ Սա Ռոբին Ուիլյամսն է։ Ինչպե՞ս է այդտեղ՝ Նոր Զելանդիայում։ Ես ուղարկում եմ քեզ ողջ իմ սերը, այդ պատճառով էլ կարող ես ջնջել ինձ քո «գործերի ցուցակից»»,- ասում է Ռոբինը, այնուհետև կարճ երգ երգում և օդային համբույր ուղարկում։

Վիվիանի ամուսնու՝ Ջեքի խոսքով, իրենք դեռ չեն քննարկել Ուիլյամսի ինքնասպանությունը, քանի որ դա չափազանց ցավոտ թեմա է Վիվիանի համար։ Ամուսինները որոշել են պատմել այդ տեսաուղերձի մասին, որպեսզի ցույց տան, թե որքան հրաշալի մարդ էր դերասանը։