Վիոլետա Գևորգյանի 70-ամյակին նվիրված հոբելյանական երեկո՝ Սունդուկյանի անվան թատրոնում

ՀՀ ժողովրդական արտիստուհի, պետական մրցանակների դափնեկիր Վիոլետա Գևորգյանը 70 տարեկան է, ինչի առիթով վաղը Սունդուկյանի անվան ազգային ակադեմիական թատրոնում տեղի կունենա նրա հոբելյանական երեկոն: Հոբելյանական երեկո ներկայացումը բեմադրել է ՀՀ ժողովրդական արտիստ Վահե Շահվերդյանը:

«Վիոլետը այն բացառիկներից է, որ տարիքը չի թաքցնում, քանի որ դրանք վաստակած տարիներ են: Վիոլետն ասում է ՝ «Իմ կյանքը բաժանվում է երկու մասի՝ մինչ իննսունականները և դրանից հետո: Այդտեղ կան և՛ հաճելի, և՛ ոչ հաճելի տարիներ, ստեղծագործական բերկրանքի ու ստիպված պարապուրդի շրջան: Հոբելյանական երեկոյի ընթացքում Վիոլետը հանդես է գալու իր լավագույն դերերով և մենախոսությամբ»,-ասաց Վահե Շահվերդյանը այսօր հրավիրված մամուլի ասուլիսին:

Վիոլետա Գևորգյանը նշեց, որ երբ դերասանը չի աշխատում երկար ժամանակ նրա ստեղծագործական աշխատանքը տուժում է:

«Ես սովոր էի շուրջ 22 տարի ապրել թատրոնի կյանքով, մի օր որ ներկայացում չէի ունենում, հիվանդանում էի: Թատրոնը իմ կյանքն էր, որից զրկվեցի 1988-ին: Ես չէի պատկերացում, որ կապրեմ, բայց ապրում եմ ու տեսքս էլ բավական լավն է, իսկ թե ինչ է կատարվում իմ ներսում, միայն Աստված գիտի»,-ասաց նա:

Հարցին, թե հետևո՞ւմ է՝ հայկական թատերական աշխարհի անցուդարձին, Վիոլետա Գևորգյանը պատասխանեց, որ ոչ՝ բացատելով, որ նյարդայնանում է:

«Ես ներվայանում եմ, որ մեջը չկամ, այո, նախանձում եմ ու նախանձում եմ նաև ռուսներին, որովհետև իրենք իրենց դերասանուհուն կպահեին երկրում ու կասեին՝ «наша великая актриса»»,-ասաց նա:

Հարցին, թե այդ դեպքում ինչու չի գալիս և ապրում ու ստեղծագործում հայրենիքում, պատասխանեց, որ իրեն չեն հրավիրում: Իսկ թե ո՞ւմ հրավերքին է սպասում, Վիոլետ Գևորգյանը նշեց, որ հենց մեկը՝ իր կողքին նստած Վահե Շահվերդյանի, ով երկար տարիներ ղեկավարել է Սունդուկյանի անվան թատրոնը:

«Չի ասում՝ արի՝ էս կտամ, էն կտամ, ես էլ թոշակ եմ ստանում ԱՄՆ-ում, իմ համար ապրում եմ»,-ասաց նա:

Վահե Շահվերդյանն էլ արձագանքեց. «Չեմ հրավիրել, որովհետև Վիոլետային այդքան լավ չգիտեի, ես չէի գտնում դրա անհրաժեշտությունը, հիմա ոչ միայն ես, այլ նաև բազմաթիվ թատրոններ գտնում են դրա անհրաժեշտությունը, և բայց հիմա էլ ինքը չի գտնում դրա անհրաժեշտությունը»։