Քաղծառայողների աշխատանքի որակը 2017թ-ից կգնահատվի ամեն օր. Մանվել Բադալյան
Հայաստանի քաղաքացիական ծառայության խորհրդի նախագահ Մանվել Բադալյանն այսօր լրագրողների հետ զրույցում ասաց, որ Հայաստանում որակյալ հանրային ծառայություն ունենալու համար պետք է նախ ունենալ որակյալ հանրային քաղաքացիական ծառայողներ:
Նա ընդգծեց, որ իրենք ներկայումս ջանք չեն խնայում հասարակությանը որակյալ հանրային աշխատողներով ապահովելու համար:
«Միշտ չէ, որ որակը բավարարում է պահանջներին, և գաղտնիք չէ, որ հասարակության մեջ հաճախ լսում ենք դժգոհություններ չինովնիկների տրամադրած ծառայությունների որակի վերաբերյալ, հատկապես երբ անմիջական կապ են ունենում մեր քաղաքացիների հետ: Ուստի մեր հիմնական խնդիրն այսօր այն է, որ կարողանանք արմատավորել այն գաղափարը, որ պետք է քաղաքացիական ծառայողների որակները՝ մասնագիտական, գործնական, կառավարչական, բարելավենք»,-ասաց նա:
Մանվել Բադալյանն ընդգծեց, որ իրենց ուշադրություն պետք է դարձնեն քաղծառայողի ուսուցմանը և աշխատանքի ամենօրյա գնահատմանը, սակայն դա ավելի արդյունավետ կկարողանան անել 2017թ.-ից, երբ ներդրվի համապատասխան համակարգը:
«Առաջիկա երկու տարիներին պետք է կարողանանք գնահատման նոր մոդել ներդնել, ներկայումս գործում է ատեստավորման համակարգը, որն ամբողջովին հնարավորություն չի տալիս մոտիվացնել քաղծառայողի ամենօրյա աշխատանքի որակը»,-ասաց նա:
Մանվել Բադալյանը ցավով նշեց, որ քաղծառայողի քննություն հանձնած երիտասարդների ընդամենը 20%-ն է կարողացել ձեռք բերել քաղծառայողի հավաստագիր:
«Օրինակ` մարդիկ կան, որ չգիտեն, թե որոնք են ՀՀ-ին սահմանակից երկրները կամ քանի մարզ ունի Հայաստանը: Սրանք տարրական գիտելիքներ են, որոնց պետք է տիրապետի քաղծառայողը: Հարցերը հիմնականում են վերաբերում են ՀՀ սահմանադրությանը «ՀՀ քաղաքացիական ծառայության մասին» օրենքին, համակարգչային գիտելիքներին, հայոց լեզվին և ինչ-որ չափով հայոց պատմությանը»,-ասաց նա:
Հարցին, թե խորհրդի վրա ճնշումներ չեն լինո՞ւմ իշխանական շրջանակից, բանախոսը պատասխանեց, որ հիմնականում ճնշումները բարեկամ-հարևան-ընկերներ շրջանակից է, ոչ թե գործընկեր պաշտոնյաների:
«Երբ իմ ուսուցիչն է ինձ ինչ-որ բան խնդրում, ավելի դժվար է մերժել: Երբ գործընկերս է խնդրում, շատ հանգիստ կարող եմ մերժել, որովհետև առաջին հերթին ինձ համար աշխատողի գիտելիքն է կարևոր»,-ասաց նա:










