Իրաքի Մոսուլ քաղաքում ԻՊ-ի գրոհայինները քրիստոնեական տաճար են պայթեցրել
«Իսլամական պետություն» ահաբեկչական խմբավորման գրոհայինները պայթեցրել են Իրաքի Մոսուլ քաղաքում գտնվող Սուրբ Գեորգիի քրիստոնեական տաճարը, հայտնում է ՏԱՍՍ գործակալությունը։
Քաղաքի հյուսիս-արևելքում տեղակայված վանքը համարվում էր ամենամեծերից մեկը և մեծ ժողովրդականություն է վայելում Մոսուլի քրիստոնյաների շրջանում։
Ըստ հաղորդագրությունների՝ մշակութային շինությունը պայթեցվել է երեկ։ Բացի տաճարից, ծայրահեղականները ոչնչացրել են նրա հարևանությամբ գտնվող մի քանի բնակելի շինություններ, ինչպես նաև տարածք, որը նախատեսված է եղել բարեգործական օգնություն բաժանելու համար։
Հայտնի է նաև, որ տաճարի հարևանությամբ գտնվում է քրիստոնեական գերեզման, որի մասին տեղեկություններ դեռ չկան։










