Ֆրանսուա Օլանդի հովանու ներքո Փարիզում կանցկացվի Հայոց ցեղասպանությանը նվիրված գիտաժողով
Հայոց ցեղասպանության 100-րդ տարելիցին ընդառաջ Փարիզում մարտի 25-28-ը կկայանա «Հայոց ցեղասպանությունը Օսմանյան կայսրությունում առաջին համաշխարհային պատերազմի ժամանակ. 1915-2015թթ. հետազոտության 100 տարի» խորագրով գիտաժողովը: «Արմենպրես»-ի հետ զրույցում ՀՅԴ Հայ դատի հանձնախմբի անդամ Մուրադ Փափազյանը նշեց, որ 4-օրյա գիտաժողովը կանցկացվի Ֆրանսիայի Նախագա Ֆրանսուա Օլանդի պատվո նախագահությամբ:
«Ֆրանսուա Օլանդը Հայոց ցեղասպանության 100-րդ տարելիցի միջոցառումների իրականացման համար մեծագույն ներդրում ունի: Այս գիտաժողովն էլ կանցկացվի նրա հովանու ներքո, և շատ կարևոր է, որ գիտաժողովի բացմանը Ֆրանսիայի կրթության նախարարը կընթերցի Օլանդի ուղերձը»,- ասաց Փափազյանը: Գիտաժողովի մեկնարկը կտրվի Սորբոնի համալսարանում:
Այնուհետև քննարկումները կշարունակվեն Ազգային գրադարանում և Հրեաների ցեղասպանության թանգարանում:
«Գիտաժողովի նպատակն այն է, որ չորս օր շարունակ ներկայացվեն Հայոց ցեղասպանության մասին այն բոլոր գիտական աշխատանքները, որոնք կատարվել են վերջին տասնամյակների ընթացքում»,- ընդգծեց Մուրադ Փափազյանը:
Գիտաժողովում ելույթներ կունենան հայ և օտարերկրացի ցեղասպանագետներ, փորձագետներ, պատմաբաններ: Թուրքիայից միջոցառմանը կմասնակցեն Ռագըփ Զարաքոլուն և Թաներ Աքչամը:
.










