Դատարանն արգելել է ամերիկացուն՝ ծխել սեփական տան մեջ
Վաշինգտոնի բնակիչ Էդվին Գրեյին դատարանը ժամանակավորապես արգելել է ծխախոտ, սիգար և մարիխուանա ծխել սեփական տանը:
Ինչպես հայտնում է Lenta.ru-ն` ABC7-ին հղումով, ամերիկացու հարևանները բողոքել են ծխի հոտից, որը նրանց տուն է լցվում նկուղի բաց տարածության միջոցով:
Նշվում է, որ ծխող ամերիկացու հարևանությամբ բնակվողները նոր տուն են տեղափոխվել մոտ մեկ տարի առաջ: Սկզբում նրանք փորձում էին պայմանավորվել տղամարդու հետ, որ նա տանը չծխի, սակայն երբ նա հրաժարվել էր, հարևանները քաղաքացիական դատարան էին դիմել: Ծխելու արգելքից բացի ընտանիքը պահանջել է նաև 500 000 դոլար վճարել իրենց` որպես վնասի փոխհատուցում:
Դատական լսումների ժամանակ Գրեյին և նրա ընտանիքի անդամներին ու հյուրերին արգելել են ծխել շենքի ներսում: Գրեյի քույրը վրդովված է և չի պատկերացնում՝ ինչպես իր ընտանիքին թույլ չեն տալիս ծխել սեփական տանը, որը նրանց է պատկանում կես դարից ավելի:










