Նաիրիտցիները հանդիպել են Երվանդ Զախարյանին

21:45 • 13.03.15

«Նաիրիտ» գործարանի աշխատակիցներն այսօր հանդիպել են ՀՀ էներգետիկայի ու բնական պաշարների նախարար Երվանդ Զախարյանի հետ: Այս մասին Tert.am-ին տեղեկացրեց գործարանի արհմիության նախագահ Հրաչ Թադևոսյանը: Նա նշեց, որ նախարարը որևէ խոստում չի տվել, այլ տեղեկացրել է, որ ներկայում ՀՀ Կառավարությունը Միջպետական բանկի հետ բանակցություններ է վարում գործարանի վերաբերյալ:


«Նախարարն ասաց, որ դրանց ավարտից հետո կկարողանան վճարել գործարանի աշխատողների աշխատավարձերը: Ժամկետներ չնշվեցին, բայց մի տեսակ հույս ենք կապում Միջպետական բանկի հետ»,-ասաց նա:


Հիշեցնենք, որ նաիրիտցիները պահանջում են իրենց չվճարված 18 ամսվա աշխատավարձը:

 

Թեև նախորդ շաբաթ նաիրիտցիները որոշել էին մարտի 16-ին նստացույց անել, սակայն ինչպես նշեց Հրաչ Թադևոսյան՝ այս պահին որևէ հստակ բան չեն որոշել: