Եգիպտոսում 45 միլիարդ դոլարով երկրորդ Դուբայ կկառուցեն, ուր կվերաբնակեցվի 5 միլիոն մարդ

16:40 • 14.03.15

Եգիպտոսը մտադիր է սկսել երկրորդ Դուբայի կառուցումը՝ քաղաք, որը ոչ միայն կկարողանա մրցել Միացյալ Էմիրությունների և աշխարհի ամենաճոխ բիզնես կենտրոնի հետ, այլև մասամբ  կբեռնաթափի գերբնակեցված Կահիրեն, գրում է ТАСС-ը:

 

Եգիպտոսի նոր վարչական մայրաքաղաք կառուցելու համար Էմիրաթների հետ պայմանագրի ստորագրման արարողությունը կայացել է շաբաթ օրը Շարմ-էլ-Շեյխում՝ այնտեղ անցկացվող Միջազգային տնտեսական համաժողովի շրջանակներում: Նախագծի իրականացման արժեքն է 45 միլիարդ դոլար:

 

Նոր Կահիրեն նախատեսվում է կառուցել մայրաքաղաքից արևելք ընկած հատվածում՝ քաղաքի կենտրոնից 45 կիլոմետր հեռավորության վրա:

 

Այժմ այնտեղ անապատ է, բայց արդեն 5-7 տարուց այնտեղ կկարողանան տեղափոխվել առաջին բնակիչները:

 

Կահիրեն վարչական մայրաքաղաքի հետ կկապվի երկաթուղային ցանցով: Այն կունենա նաև սեփական օդանավակայանը:


Քաղաքում նախատեսվում է ստեղծել հսկայական զբոսայգի, որն իր տարածքով կհավասարվի չորս «Դիսնեյլենդների»:


Մոտ 90 քառակուսի կիլոմետր կհատկացվի դաշտերի, որտեղ կտեղադրվեն արևային էներգիայի մշակման համար պանելներ, ինչը թույլ կտա վարչական մայրաքաղաքին ապրել գրեթե ինքնավար կերպով:


Այս հավակնոտ նախագծի իրականացումը թույլ կտա մայրաքաղաքից վերաբնակեցնել 5 միլիոն մարդու, ընդ որում «բնակիչների» մեծ մասը կկազմեն պաշտոնյաները: