Վիետնամում ՀՀ դեսպանն այդ երկրի ԱԺ նախագահին է ներկայացրել ԼՂ խնդրի կարգավորմանն ուղղված ջանքերը
Հանոյում կայանալիք Միջխորհրդարանական միության վեհաժողովի 132-րդ նստաշրջանին (ս/թ. մարտի 28-ից ապրիլի 1-ը) ընդառաջ` մարտի 14-ին Վիետնամի ԱԺ ղեկավարության կողմից կազմակերպված հանդիպման շրջանակներում Վիետնամում ՀՀ դեսպան Ռաիսա Վարդանյանը հանդիպում է ունեցել Վիետնամի Ազգային ժողովի նախագահ Նգույեն Սին Հունի հետ։
Այս մասին հայտնում են ՀՀ արտաքին գործերի նախարարության մամուլի ծառայությունից։
Դեսպան Վարդանյանը զրուցակցին շնորհակալություն է հայտնել` միջխորհրդարանական կապերի ամրապնդման հարցում գործադրած ջանքերի համար և ընդգծել, որ հայ-վիետնամական երկկողմ հարաբերությունների զարգացման գործում իր ուրույն տեղն ունի Հայաստան-Վիետնամ խորհրդարանական բարեկամական խումբը։
Նգույեն Սին Հունի խնդրանքով դեսպան Վարդանյանը ներկայացրել է Լեռնային Ղարաբաղի հակամարտության խաղաղ կարգավորման ուղղությամբ Հայաստանի և ԵԱՀԿ Մինսկի խմբի համանախագահների ջանքերը և Հայոց ցեղասպանության 100-րդ տարելիցի կապակցությամբ նախատեսվելիք միջոցառումները։
Զրուցակիցներն անդրադարձել են նաև տարածաշրջանային արդի խնդիրներին:










