Իրաքում ավերվել է Սադամ Հուսեյնի շիրիմը (լուսանկարներ)
Իրաքի Տիկրիտ քաղաքի համար «Իսլամական պետություն» ահաբեկչական խմբավորման գրոհայինների ու իրաքցի զինվորների միջև տեղի ունեցած ռազմական գործողությունների հետևանքով ավերվել է երկրի նախկին առաջնորդ Սադամ Հուսեյնի շիրիմը:
Ինչպես նշում է lenta.ru-ն, ակտիվ բախումները սկսվել են մարտի 15-ին. դրանք հիմնականում ընթացել են Տիկրիտի հյուսիսում ու դրանից հարավ ընկած հատվածում:
Կապիտան Յասիր Նումայի խոսքով՝ առավել լուրջ հարձակման է ենթարկվել Հուսեյնի հայրենի Ուջա գյուղը, որտեղ էլ գտնվում է նրա շիրիմը:
Ականատեսների համաձայն՝ նախկին առաջնորդի շիրիմից մնացել են միայն հենասյուները, իսկ նրա դիմանկարներն անհետացել են: Հիմա դրանց փոխարեն կախված են շիաների դրոշները:
Աղբյուրը հավելում է, որ 2014թ. «Իսլամական պետության» ահաբեկիչները վերացրել են Հուսեյնի հոր` Տիկրիտում գտնվող շիրիմը:















