15.000 ֆունտ. Չապլինի ամուսնալուծության սկանդալային փաստաթղթերը վաճառքի են հանվել (լուսանկարներ)

Համր կինոյի աստղ Չարլի Չապլինի՝ 2-րդ կնոջից ամուսնալուծվելու սկանդալային փաստաթղթերը վաճառքի են դրվել աճուրդում, գրում է Газета-ն։

Այդ փաստաթղթերում նշվում է դերասանի կնոջ՝ Լիտա Գրեյի խոսքերն այն մասին, թե ինչպես է Չապլինն իրեն «գայթակղել», երբ նա դեռ անչափահաս է եղել, ինչպես է նա հղիացել և ինչպես է դերասանն իրեն դավաճանել երիտասարդ դերասանուհիների հետ։

Ամուսնալուծության մասին փաստաթղթերի օրիգինալը հայտնաբերվել է Լոս Անջելեսի Առաջին ազգային բանկում։ Թղթերի վաճառքով զբաղվում է բրիտանական Parade Antiques ընկերությունը։ 50 էջը գնահատվում է 15.000 ֆունտ ստերլինգ։

Նշվում է, որ արվել է այդ փաստաթղթերի մոտ 16 կրկնօրինակ, որոնք ուղարկվել են Չապլինին և գործընթացի հետ կապված տարբեր ընկերությունների և բանկերի։

35-ամյա Չապլինը և 16-ամյա Գրեյն ամուսնացել են 1924-ին և միասին ապրել 3 տարի։ Ենթադրվում է, որ փաստաթղթերում նշված մանրամասների նպատակն է եղել վնասել Չապլինի հեղինակությանը և մեծ փոխհատուցման հասնել։ Նրանք ամուսնալուծվել են 1927-ին, և Գրեյը ստացել է 800.000 դոլար։