Եղանակն՝ այսօր
Իրանի վերաբերմունքը մեր հուշարձանների նկատմամբ օրինակելի է. Սամվել Կարապետյան
Երևանում հոկտեմբերի 29-ին կկայանա «Հայկական ճարտարապետությունն Իրանում» ցուցահանդես: Այս մասին այսօր մամուլի ասուլիսին հայտնեցին հուշարձանագետ Սամվել Կարապետյանը և Հայաստանում ԻԻՀ դեսպանատան մշակույթի կենտրոնի տնօրեն Մաջիդ Մեշքին:
Սամվել Կարապետյանը հայտնեց, որ ցուցահանդեսի նախաձեռնությունն Իրանի դեսպանատան մշակույթի կենտրոնինն է: «Սա մի բացառիկ դեպք է հարևանների պարագայում, քանի որ մինչև հիմա նույնիսկ Վրաստանի կողմից երբևէ չի նախաձեռնվել հայկական հուշարձանների ցուցահանդես»,- ասաց նա և նշեց, որ սա շատ ուրախացնող նախաձեռնություն է:
Հուշարձանագետը նշեց, որ ցուցահանդեսին ներկայացվելու են մինչև 20-րդ դարի սկզբի հուշարձաններ, ցուցահանդեսը լինելու է Թումանյանի թանգարանում և տևելու է մեկ ամիս:
Սամվել Կարապետյանը նկատեց, որ Իրանը ջանք չի խնայել հայկական հուշարձանների վերականգնման հարցում: «Իրանի Իսլամական Հանրապետության վերաբերմունքը մեր հուշարձանների նկատմամբ ուղղակի օրինակելի է: Իմ երախտագիտությունն եմ հայտնում Իրանին, որ այդչափ քաղաքակրթական առումով բարձր է գնահատում մեր մշակույթը և պետական մակարդակով վերականգնում, եզակի հարևան է»,-ասաց նա:
Հայաստանում ԻԻՀ դեսպանատան մշակույթի կենտրոնի տնօրեն Մաջիդ Մեշքինը ասաց, որ այս ցուցահանդեսը յուրօրինակ է ճարտարապետության առումով: Նա նշեց, որ ցուցահանդեսի գաղափարը վաղուց է եղել և վաղուց են ցանկացել այն կազմակերպել Սամվել Կարապետյանի հետ:
«Այս ամբողջ ուշադրությունը, որ մենք ունենք հայկական ճարտարապետության նկատմամբ, նրանից է, որ իրանի ժողովրդի համար հայ ժողովուրդը հյուր չէ, երկրորդ կարգի քաղաքացի չէ, այլ լիարժեք քաղաքացի է և պետք է հարգվի նրա արժեքը»,-ասաց նա:
Նա նշեց, որ ինչպես կարող են չհարգել հայերի հարուստ ժառանգությունը, որոնք բազմաթիվ ճարտարապետական կոթողներ են ստեղծել: Նա ասաց, որ ցանկանում են ցույց տալ հայերի մատուցած ծառայությունը այն երկրին, որտեղ դարեր շարունակ ապրել են և ավելացրեց, որ հայկական հուշարձանների նկատմամբ նույն վերաբերմունքն ունեն, ինչ Իրանի հուշարձանների նկատմամբ:
Նա նաև ասաց, որ հայ մշակութային ժառանգությունը այնքան բազմաբովանդակ է և շատ, որ կարծում է տարին մեկ անգամ ցուցահանդես կլինի:
Studio One