Իրանցի դերասանուհուն աշխատանքից ազատել են՝ առանց գլխաշորի նկար հրապարակելու համար

Իրանի կառավարությունն արգելել է դերասանուհի Սադաֆ Թահերիանին աշխատել երկրում այն բանից հետո, երբ նա Instagram-ի իր էջում առանց գլխաշորի նկար է հրապարակել, գրում է The Independent-ը։

Մինչև վերջերս Թահերիանը սոցցանցերում տեղադրել է լուսանկարներ այնպիսի հագուստով, որը համապատասխանում է իրանական օրենքներին: Սակայն անցյալ շաբաթ կինն ի նշան բողոքի լուսանկար է տեղադրել՝ առանց գլխաշորի:

Նա հայտարարել է, որ դեմ է հարկադրված հիջաբ կրելուն և իրանական կառավարության այլ ճնշումներին:

Իրանի կառավարական լրատվամիջոցները զգուշացնում են, որ կանայք, որոնք գլխաշոր չեն կրում, կարող են ուշադրության կամ անգամ տղամարդկանց հարձակումների զոհ դառնալ: Սակայն դերասանուհին ասում է, որ դրան բախվել է անկախ գլխաշոր ունենալ-չունենալու հանգամանքից։

Իրանի մշակույթի նախարարությունը կարծում է, որ Թահերիանը հրաժարվել է գլխաշոր կրել արևմտյան լրատվամիջոցների ազդեցության տակ և պահանջել է նրան զրկել աշխատանքային արտոնագրից:

Նշվում է, որ լուսանկարի հրապարակումից հետո Սադաֆի հասցեին բազմաթիվ վիրավորական արտահայտություններ են եղել, սակայն կինը պնդում է, որ չի զղջում իր արարքի համար։