Կանադայի վարչապետը ստիպել է Մեծ Բրիտանիայի թագուհուն իրեն ծերացած զգալ

Կանադայի վարչապետ Ջասթին Տրյուդոն ստիպել է Մեծ Բրիտանիայի թագուհի Էլիզաբեթ 2-րդին իրեն ծերացած զգալ: Այդ մասի թագուհին կատակով ասել է Մալթայում Ազգերի համագործակցության գագաթաժողովի ողջույնի խոսքի ժամանակ, փոխանցում է ՏԱՍՍ գործակալությունը։

43-ամյա Տրյուդոն հանդիսավոր ընդունելության ժամանակ անկաշկանդ մթնոլորտում հիշեցրել է ներկաներին, որ ինքն ամենաերիտասարդ վարչապետն է միջոցառմանը։

Այնուհետև նա դիմել է Էլիզաբեթ 2-րդ թագուհուն` հիշեցնելով, որ նա շատ հաճախ է այցելել Կանադա, այդ թվում` Օտտավա, որտեղ 1982-ին ստորագրել է Սահմանադրական ակտ- 1982-ը` Կանադայի սահմանադրության մի մասը (այդ ժամանակ վարչապետը եղել է 9 տարեկան, թագուհին` 55)։

Կանադական կառավարության ղեկավարն իր խոսքում նշել է նաև, որ բրիտանացի թագուհին Կանադան ավելի լավ գիտի, քան շատ կանադացիներ:

Էլիզաբեթ 2-րդ թագուհին, իր հերթին, դիմել է գագաթաժողովի մասնակիցներին։

«Շնորհակալություն Կանադայի վարչապետին, որ ստիպեց ինձ այդքան ծեր զգալ»,- ժպտալով ասել է թագուհին, ով 2016թ. ապրիլի 21-ին կտոնի 90-ամյա հոբելյանը։