Կարմիր քարտ՝ իշխանություններին. բողոքի երթ Երևանում

19.21

Ոստիկանությունը քիչ առաջ «Կարմիր քարտ» նախաձեռնության անդամներից երկուսին ոստիկանության մեքենայով բերման ենթարկեց:

Քիչ անց նախաձեռնության անդամներից մի քանիսը նստեցին փողոցի կենտրոնում. նրանց ոստիկանները տարան դեպի մայթ, մի քանիսին՝ ոստիկանության բաժին:

18.40

«Կարմիր քարտ» նախաձեռնության անդամները քիչ առաջ Երևանի Ազատության հրապարակից դեպի Բաղրամյան 26  կազմակերպել էին բողոքի երթ, որով, իրենց խոսքով, «կարմիր քարտ են ցույց տալիս» իշխանությանը:

Ցուցարարները պահանջում են իջեցնել էլեկտրաէներգիայի, գազի, ալյուրի, շաքարավազի, բենզինի գները: Նրանք երթի ժամանակ կոչ էին անում միանալ իրենց և նշում էին՝ «Մենք ենք տերը մեր երկրի»:

Երբ բողոքի մասնակիցները ցանկանում էին անցնել ՀՀ նախագահականի նստավայրի մայթ,  ոստիկանները նրանց թույլ չտվեցին:

«Նախագահի նստավայրը հանդիսանում է հատուկ կարևոր ռազմավարական օբյեկտ, որի մոտով անցնելու իրավունք այս պահին չունեք»,-պարզաբանեցին ոստիկանությունից:

Երբ երթի մասնակիցները փորձեցին անտեսել ոստիկանության պահանջը և անցնել դիմացի մայթ, ոստիկանները թույլ չտվեցին։ Այս պահին ոստիկանները պատ են կազմել, իսկ երթի մասնակիցները բացականչում են՝ «Ամո՛թ», «ՀՀ ոստիկանություն, ա՛յ քեզ խայտառակություն»:

Այնուհետև ցուցարարները երգելով քայլեցին դեպի Ազգային ժողով:


Նախաձեռնության անդամ Մանուկյան Սևակը լրագրողների հետ զրույցում ասաց, որ իրենք Ազգային ժողով մի շաբաթ առաջ նամակ էին հանձնել և հիմա եկել են պատասխան ստանալու և ևս մեկ անգամ համոզվեցին, որ «մեզ նման կառավարություն, Ազգային ժողով հարկավոր չէ:

«Մենք կոնկրետ քայլով միանալու ենք «Նոր Հայաստան» ուժին»,-հայտարարեց նա: