«Իսլամական պետությունը» ստանձնել է Կալիֆորնիայում զանգվածային սպանության պատասխանատվությունը

«Իսլամական պետություն» ահաբեկչական խմբավորումը ստանձնել է Կալիֆորնիայի Սան Բերնարդինո բնակավայրում տեղի ունեցած զանգվածային սպանության պատասխանատվությունը։ Այդ մասին  հայտնում է Reuters գործակալությունը՝ ահաբեկիչների հայտարարությանը հղումով։

««Իսլամական պետության» երկու հետևորդներ մի քանի օր առաջ հարձակում են իրականացրել Կալիֆորնիայում Սան Բերնարդինոյի կենտրոնի վրա»,-ասված է հաղորդագրության մեջ։

Ինչպես հաղորդում է Los Angeles Times-ը, երկու զինյալներից մեկը՝ Սայեդ Ռիզվան Ֆարուքը, շփվել է առնվազն երկու արտասահմանյան ահաբեկչական խմբավորումների հետ, այդ թվում՝ «Ալ- Կաիդայի» սիրիական թևը համարվող «Ջեբհաթ ան-Նուսրայի» հետ։ Ֆարուքի կինն ու համախոհը՝ Թաշգին Մալիքը, հարձակումից մի քանի րոպե առաջ Facebook-ում հավատարմության երդում էր տվել ԻՊ-ի առաջնորդ Աբու Բաքր ալ-Բաղդադիի հետ։

Սան Բերնարդինոյում հրաձգությունը տեղի էր ունեցել դեկտեմբերի 2-ի գիշերը։ Հանցագործները ներխուժել էին սոցիալական ապահովության կենտրոնի դահլիճ ու կրակ բացել շենքում ներկաների վրա։ Զոհվել էր 14, վիրավորվել՝ 21  մարդ։ Ֆարուքն ու Մալիքը ոչնչացվել էին իրավապահների հետ հրաձգության ընթացքում։