Մոսկվայում բացվել է «Հայաստան. լինելիության լեգենդներ» ցուցահանդեսը

ՌԴ և Հայաստանի մշակույթի նախարարներ Վլադիմիր Մեդինսկին և Հասմիկ Պողոսյանը Ռուսաստանի Պատմության պետական թանգարանում ներկա են գտնվել  «Հայաստան. լինելիության լեգենդներ»  ցուցահանդեսի բացմանը, որում ներկայացված են ավելի քան 160 եզակի ցուցանմուշներ:

Ինչպես փոխանցում է РИА Новости-ն, ցուցադրվող իրերի ցանկում տեղ են գտել ցուցանմուշներ Հայաստանի 3 առաջատար թանգարաններից` Հայաստանի պատմության թանգարանից, Սուրբ Էջմիածնի թանգարաններից և Մատենադարանից:

«Այն փաստը, որ 160 եզակի ցուցանմուշներ, որոնք  ներկայացնում են հայկական պետության զարգացման բոլոր փուլերը, ցուցադրվում են այստեղ, հոյակապ է», - ասել է ՌԴ մշակույթի նախարարը: 

Նշվում է, որ Հասմիկ Պողոսյանը ՀՀ մշակույթի նախարարության ոսկե մեդալով է պարգևատրել  ՌԴ Պատմության թանգարանի տնօրեն Ալեքսեյ Լևիկինին:

Ցուցադրության ներկայացված հնագույն իրերի թվում են Ուրարտուի հուշարձանները`  սեպագիր արձանագրություններ, աստվածների բրոնզե  արձանիկներ, կերամիկական իրեր, զինատեսակներ:

Հայոց պատմության Հելլենիստական շրջանը ներկայացված է  մ.թ.ա. 4-2-րդ դարերի  կոթողներով, որոնց թվում են  Աֆրոդիտե աստվածուհու մարմարե արձանը:

Հայաստանի պատմության թանգարանը տրամադրել է ժամանակակից Հայաստանում հայտնաբերված գտածոներ` ծիսակարգային սափորներ, կենդանակերպ կավե անոթներ ու քանդակներ: