Եղանակն՝ այսօր
Հարյուր անգամ շքեղ շենք ենք ունենալու. Սոս Պետրոսյանը՝ կրկեսի բացման մասին
Երևանի կրկեսի գեղարվեստական ղեկավար, «Հայաստանի կրկեսային գործիչների միության» նախագահ, պրոֆեսոր Սոս Պետրոսյանն այսօր մամուլի ասուլիսին հայտնեց, որ կրկեսի բացումը տեղի կունենա հաջորդ տարի՝ մինչև հոկտեմբեր:
«Ես ձեզանից շատ եմ շտապում, մյուս տարվա մինչև հոկտեմբեր բացումը պետք է անենք: Ես ունեմ մեծ երազանք, սցենարը գրել եմ, թե ինչպես պետք է բացումը լինի»,- ասաց նա և նշեց, որ ցանկանում է, որպեսզի լիցենզավորված փառատոն լինի: Նա վստահեցրեց, որ հարյուր անգամ շքեղ շենք է լինելու։
Սոս Պետրոսյանը նշեց, որ վերջերս ստեղծել են միջազգային հայկական կրկեսային միություն, որն ունի երեք հազար անդամ և բոլորն ուզում են բացմանը ներկա լինել։
«Հայաստանի կրկեսային գործիչների միության» նախագահը լավ կրկես կառուցելու համար շնորհակալություն հայտնեց «Տաշիր» գրուպին: «Այդ մարդիկ կրկես են նվիրում հանրապետությանը լավ հասկանալով, որ այն բիզնեսի դաշտ չունի: Մենք ունեցել ենք մի կրկես, որտեղ ձմռանը ներսը ավելի ցուրտ էր քան դրսում, իսկ ամռանը ավելի շոգ էր, քան դուրսը, սակայն և մի օր էլ չի կանգնել կրկեսը: Մենք կրկեսային արվեստի զարգացման համար պետությունից մի լումա չենք ստացել»,-ասաց նա:
Սոս Պետրոսյանը նաև վստահեցրեց, որ նոր կրկեսը ժամանակակից պայմաններին համապատասխանելու է և եթե առաջ չէին կարողանում օդային տեսարաններ բեմադրել, կրկեսը սառույցի վրա և այլն, հիմա արդեն կարող են դա անել: Նրա խոսքով՝ արդեն վեցերորդ հարկն են ավարտում և կրկեսը կունենա ութ հարկ, դահլիճում կլինի ոչ թե նախկինի նման 1563 տեղ, այլ կլինի 2500 տեղ:
Ինչ վերաբերում է տոմսի արժեքներին, ապա նա ասաց, որ դեռ շուտ է այդ մասին ասել, բայց «Տաշիր» գրուպի ղեկավարության հետ խոսել է և նրանք ոչ մի մտադրություն չունեն գները բարձրացնել։ Նա նշեց, որ այս տարի կրկեսային ռեժիսորների հատուկ կուրս է բացվելու թատրոնի և կինոյի ինստիտուտին կից: Ներկայումս բոլոր դերասանները հյուրախաղերի մեջ են:
Studio One