«Ոսկե ծիրանին» ներկայացվեց առաջին հայկական 360 աստիճան կրթական ֆիլմը աստղագիտության մասին

«Ոսկե ծիրան» Երևանի միջազգային կինոփառատոնի շրջանակներում այսօր տեղի ունեցավ «Թոքնոլոջի ընդ Սայնս Դայնամիքս» ընկերության կողմից մշակված առաջին հայկական 360 աստիճան կրթական ֆիլմի շնորհանդեսը:

Tert.am-ի հետ զրույցում «Թեքնոլոջի ընդ Սայնս Դայնամիքս» ընկերության տնօրեն Վահան Շաքարյանն ասաց, որ դպրոցական տարիքի երեխաների համար ներկայացնում են ֆիլմեր, որոնք ավելի հեշտ կդարձնեն բարդ ընկալելի առարկաների ուսումնասիրությունը:

«Նմանատիպ ֆիլմերն արտասահմանում մեծ պահանջարկ ունեն, բայց մենք պետք է անենք ամեն ինչ, որ մեր դպրոցականների համար լինի անվճար: Հույս ունենք, որ մինչև սեպտեմբեր կունենանք առնվազն երեք ֆիլմ, որոնք սեպտեմբերի վերջից կսկսվեն ցուցադրվել դպրոցներում: Այս ֆիլմն աստղագիտության մասին է, իսկ հաջորդ երկու ֆիլմերը կլինեն կենսաբանության ու քիմիայի մասին» ասաց Վահան Շաքարյանը:

Ծրագրային ապահովումը, ֆիլմի նկարահանումները, ըստ Շաքարյանի, Հայաստանում են արվել: Իսկ ֆիլմի սցենարը, նրա խոսքով, կազմվել է գրվել է հոգեբանների, մանկավարժների հետ համատեղ:

Վահան Շաքարյանն ասաց, որ ընտրվել են այն առարկաները, որոնք երեխաների տպավորությամբ բարդ են: 

«Մեր նպատակն այն է, որ այս ֆիլմերը նայելուց հետո մեր դպրոցականների մոտ ցանկություն առաջանա վերադառնալ գրքին, սովորել, ավելի խորանալ այս առարկաների մեջ»,- ասաց նա՝ ավելացնելով, որ ֆիլմերը կցուցադրվեն նաև մարզերում, որտեղ երեխաները հնարավորություն չունեն կինոթատրոններ այցելելու:

Ֆիլմերը կարճամետրաժ են լինելու՝ 15-ից 20 րոպե, որպեսզի երեխաներին չձանձրացնեն: