Պորոշենկոն ու Ալիևը կքննարկեն անվտանգության հարցը՝ Դոնբասում և ԼՂ-ում իրավիճակի համատեքստում. ուկրաինացի փորձագետների վերլուծությունը
Ուկրաինայի նախագահ Պյոտր Պորոշենկոն հուլիսի 13-ին պաշտոնական այցով ժամանել է Ադրբեջան: Օդանավակայանում Ուկրաինայի նախագահին դիմավորել են Ադրբեջանի վարչապետի առաջին տեղակալ Յաղուբ Էյուբովը և պաշտոնատար այլ անձինք:
Ուկրաինայում որոշ փորձագետներ կարծում են, որ Կիևի ակտիվությունն ակնհայտ է Վարշավայում կայացած ՆԱՏՕ-ի գագաթաժողովից հետո, որտեղ Պորոշենկոն և Ադրբեջանի նախագահ Իլհամ Ալիևը միմյանց հետ շփվելու հնարավորություն են ունեցել, գրում է Независимая Газета-ն: Քաղաքագետ Ալեքսանդր Լեոնովի կարծիքով՝ դեմ դիմաց բանակցությունները վկայում են այն մասին, որ քննարկվում են ռազմավարական կարևոր հարցեր:
«Ակնհայտ է, որ և Բաքուն և Կիևը չեն կարողանա շրջանցել անվտանգության հարցը, մասնավորապես՝ Դոնբասում և Լեռնային Ղարաբաղում իրավիճակի համատեքստում»,- ասել է նա:
Ինչպես գրում է կայքը, Ուկրաինայում 2014 թվականի իշխանափոխությունից հետո Ուկրաինայի և Ադրբեջանի հարաբերությունները որոշ ժամանակով դադար էին առել: Այնուամենայնիվ, Կիևը սկսել է նոր կամուրջներ հաստատել Բաքվի հետ: Մայիսի վերջին Պյոտր Պորոշենկոն և Իլհամ Ալիևն անձամբ հանդիպել են Ստամբուլում: Եվ խոսակցությունը, ինչպես պնդում են տեղեկացված աղբյուրները, կրել է ոչ պաշտոնական, այլ բավականին ընկերական բնույթ: Մերձարևելյան հետազոտությունների կենտրոնի տնօրեն Իգոր Սեմիվոլոսը կարծում է, որ իրավիճակի վրա ազդել է Լեռնային Ղարաբաղում ապրիլին տեղի ունեցած սրացումը:
«Նախկինում Իլհամ Ալիևը Մոսկվայի հետ մերձեցման ուղղություն էր վերցրել: Դա արվել էր այն հույսով, որ Ռուսաստանը կօգնի Ադրբեջանին Լեռնային Ղարաբաղի հակամարտության կարգավորման հարցում: Բացի այդ, Ադրբեջանը Ռուսաստանի հետ 5 միլիարդ արժողությամբ ռազմական պայմանագիր է կնքել: Այդ պատճառով Ուկրաինայի հետ Բաքուն առավելագույն կերպով չեզոք էր պահում իրեն»,- փորձագետն ասել է «Ազատություն» ռադիոկայանին։
Դա մինչև այն պահը, երբ, Սեմիվոլոսի խոսքով, Կիևն իր աջակցությունը հայտնեց ադրբեջանական կողմին: Այդ փաստը, փորձագետի կարծիքով, թույլ տվեց վերսկսել երկխոսությունը գործընկերության մթնոլորտում:
Ինչպես գրում է ukraina.ru կայքը, ուկրաինացի քաղաքագետ Վալենտին Վոյտկովը կարծում է, որ այսօր Կիևը վստահելի դաշնակիցներ է փնտրում, և Ադրբեջանն այդ երկրների ցանկում է: Այնպես որ, այցն առանց Լեռնային Ղարաբաղի հարցի քննարկման չի անցնի: Փորձագետի կարծիքով՝ Բաքուն շահագրգռված է Կիևի օգնության հարցում՝ ինչպես երկկողմ, այնպես էլ միջազգային կազմակերպությունների մակարդակում:
Պորոշենկոյի այցից ակնկալիքներն Ադրբեջանում շատ են և բավական տարբեր: Միևնույն ժամանակ, հասկանալի է, որ այցի ընթացքում շեշտը դրվում է ընդհանուր առմամբ ոչ թե քաղաքականության, այլ տնտեսության վրա, քանի որ ուկրաինական կողմը տեսնում է Ադրբեջանի հետ համագործակցության ընդլայնման առավելությունները, գրում է կայքը:










