Տիգրան Ձիթողցյանի «Հայկական հայելի II» աշխատանքը` Հայաստանի ազգային պատկերասրահում

Ամերիկահայ հայտնի նկարիչ Տիգրան Ձիթողցյանի «Հայկական հայելի II» կտավն արդեն Հայաստանի ազգային պատկերասրահում է: Այդ մասին հայտնել է նկարիչը՝ սոցիալական ցանցերում:

«Հայաստանի ազգային պատկերասրահ, 3-րդ հարկն այսուհետ իմ «Հայկական հայելի II»-ի համար նոր և մշտական տունն է»,- գրել է նկարիչը Facebook սոցիալական ցանցում:

Ավելի վաղ հաղորդվել է, որ ամերիկահայ հայտնի նկարիչ Տիգրան Ձիթողցյանը, ով գերիրական նկարչության ժանրի լավագույն վարպետներից է, ժամանել է հարազատ Երևան:

Տիգրան Ձիթողցյանը ծնվել է Երևանում։ Նկարել սկսել է 5 տարեկան հասակից։ Առաջին անհատական ցուցահանդեսն ունեցել է 10 տարեկանում, որտեղ ներկայացրել է շուրջ 102 յուղաներկ նկարներ, որոնք ցուցադրվել են նաև Իսպանիայում, Ռուսաստանում, Ճապոնիայում, ԱՄՆ-ում։

1993-1999 թվականներին սովորել է Երևանի գեղարվեստի պետական ակադեմիայում, այնուհետև կրթությունը շարունակել է Շվեյցարիայի École Cantonale d'Art du Valais-ում, 2002 թվականին ստացել է բակալավրի աստիճան, 2005 թվականին՝ Հանրային բնագավառի արվեստի մագիստրոսի աստիճան (MAPS)։ 2009 թվականից հաստատվել է Նյու Յորքում: