«Սասնա ծռերի» գործողությունն ահաբեկչական ակտ է, և մասնակիցները պետք է անպայման պատժվեն. Էդիկ Մինասյան

15:55 • 20.07.16

Դա անշուշտ ահաբեկչական ակտ է, և մասնակիցները պետք է անպայման պատժվեն. Tert.am-ի հետ զրույցում ասաց պատմաբան Էդիկ Մինասյանը՝ խոսելով «Սասնա ծռեր» խմբի անդամների կողմից ՀՀ ոստիկանական շենքը գրավելու և ոստիկաններին պատանդ վերցնելու մասին:

«Պետք է անպայման խաղաղ ձևով հարցին լուծում տալ. պետք է շարունակել անպայման բանակցել, ընդ որում, բանակցությունը տարբեր կերպ կարող է լինել»,- ասաց նա:

Նա պատճառաբանեց, թե ինչու է «Սասնա ծռեր» խմբավորման գործողությունները համարում ահաբեկչություն։

«Եղել է մահվան դեպք, գնդապետ է մահացել, և կան վիրավորներ. տեռորիստական ակտ էր. պահանջներ կային: Բայց իմ կարծիքն այն է, որ պետք է նրանք պատասխան տան իրենց արարքների համար։ Հնարավոր է՝ մեղմացուցիչ հանգամանքներ կիրառվեն,- ասաց նա,-հարձակվում են ոստիկանության վրա, հատկապես ոստիկանական պարեկապահակային զորքի վրա... Բնական է, որ իրենք իրենց ծառայողական աշխատանքն են կատարել հարձակման ժամանակ: Վերջին հաշվով արյուն է թափվել, և դրա համար պետք է պատասխան տան»:

Ըստ Էդիկ Մինասյանի՝ բանակցություններից հետո, ստեղծված իրավիճակի խաղաղ ելքի դեպքում հանրությանը պետք է տեղյակ պահվի, թե ինչ փոփոխություններ են տեղի ունեցել, ինչ խնդիրներ են լուծվել:

Պատմաբանի կարծիքով՝ Հայաստանում վերջին օրերում կատարվողն ազդում է նաև մեր միջազգային վարկանիշի վրա։

«Շատերը համեմատում են Թուրքիայում կատարվածի հետ՝ մոռանալով, որ տարբեր խնդիրներ կան: Պետք է այս իրավիճակից ելքեր գտնել, այլապես այն ավելի կսրվի: Պետք է անպայման հանդիպել, հանդիպումների արդյունքում համաձայնության գալ»,- ասաց նա:

Հիշեցնենք, որ երեք օր է՝ «Սասնա ծռեր» խումբը զինված մտել է ՀՀ ոստիկանության պարեկապահակային ծառայության գնդի տարածք և բռնության սպառնալիքով պատանդ պահել այնտեղ գտնվող ոստիկաններին: Բանակցությունների արդյունքում պատանդներից 5-ն ազատ են արձակվել: Պատանդ են մնացել 4 ոստիկան, այդ թվում՝ Երևանի փոխոստիկանապետ Վալերի Օսիպյանը և փոխոստիկանապետ Վարդան Եղիազարյանը: