Ադրբեջանում գործ է բացվել «Ֆեթուլլահ Գյուլենի աջակիցների» դեմ
Ադրբեջանում քրեական գործ է բացվել թուրք քարոզիչ Ֆեթուլլահ Գյուլենի աջակիցների դեմ, ում Անկարան մեղադրում է Թուրքիայում ռազմական հեղաշրջման կազմակերպման համար:
Ինչպես հայտնի է դարձել BBC-ի ադրբեջանական ծառայությանը, դատախազությունը միջոցներ է ձեռնարկում «Ադրբեջանում Գյուլենի աջակիցների անօրինական գործողությունները կանխելու համար»:
Նման հայտարրություն է արել նաև դատախազության մամուլի ծառայության ղեկավար Էլդար Սուլթանովը «ՌԻԱ Նովոստի» գործակալության հետ զրույցի ժամանակ:
«Ադրբեջանի Հանրապետության տարածքում Ֆեթուլլահ Գյուլենի ահաբեկչական կազմակերպության աջակիցների անօրինական գործողությունների կանխման նպատակով երկրի գլխավոր դատախազությունում քրեական գործ է հարուցվել Ադրբեջանի քրեական օրենսգրքի համապատասխան հոդվածներով»,- հայտարարել է Սուլթանովը:
Թուրքիայի կառավարությունը հուլիսի 15-ին տեղի ունեցած հեղաշրջման անհաջող փորձից հետո սկսել է զինվորականների, իրավապահ մարմինների ներկայացուցիչների, պաշտոնյաների, դասախոսների, հասարակական գործիչների և լրագրողների շրջանում զանգվածային ձերբակալություններ իրականացնել:
Օգոստոսի սկզբին Թուրքիան օրդեր է տրամադրել ԱՄՆ-ում բնակվող Ֆեթուլլահ Գյուլենի ձերբակալության համար, ում նա համարում է չստացված հեղաշրջման կազմակերպիչ: Գյուլենի հետ կապերի կասկածանքով արդեն ձերբակալվել կամ պաշտոնից ազատվել են տասնյակ հազարավոր զինվորականներ, պետծառայողներ, դատավորներ և գիտնականներ:










