Ասանժը խնդրում է ԱՄՆ դատախազությանը բացատրել, թե ինչու Wikileaks-ի գործը մինչև հիմա դեռ չի փակվել
WikiLeaks սկանդալային կայքի հիմնադիր Ջուլիան Ասանժի փաստաբանը նամակ կուղարկի ԱՄՆ գլխավոր դատախազ Լորետա Լինչին՝ խնդրելով բացատրել, թե ինչու ԱՄՆ ազգային անվտանգությանը վնաս հասցնելու գործով իր կազմակերպության նկատմամբ հետաքննությունը շարունակվում է արդեն վեց տարի, մինչդեռ նախագահի թեկնածու Հիլարի Քլինթոնի գործը փակվել է ընդամենը մեկ տարի անց: Այդ մասին Ասանժը հայտնել է CNN հեռուստաալիքին տված հարցազրույցում:
«ԱՄՆ արդարադատության նախարարությունը, հավանաբար, որոշակի նոր ստանդարտ է սահմանել՝ փակելով Հիլարի Քլինթոնի գործը: Դրա հետաքննությունը մեկ տարի է տևել և փակվել է այն հիմքով, որ Քլինթոնը մտադրություն չի ունեցել վնաս հասցնել ԱՄՆ ազգային անվտանգությանը»,- հայտարարել է Ասանժը:
Նա նշել է, որ WikiLeaks-ը նույնպես «մտադրություն չի ունեցել» վտանգի տակ դնել ԱՄՆ ազգային անվտանգությունը և «որևէ լուրջ վնաս չի հասցրել»:
Հիշեցնենք, որ Քլինթոնը, լինելով ԱՄՆ պետքարտուղար, օգտագործել է չպաշտպանված մասնավոր սերվերները ծառայողական նամակագրության, այդ թվում՝ գաղտնի նամակագրության համար: Դա արգելված է օրենքով, այդ փաստի առթիվ ԱՄՆ-ում հետաքննություն էր սկսվել:










