Եղանակն՝ այսօր
Խնդիր ունենք նպաստելու Հայաստանում ժամանակակից արվեստի զարգացմանը. տեղի ունեցավ «Արվեստ Հայաստան» հիմնադրամի բացման արարողությունը
Հայաստանում արվեստի բնագավառում կան շատ հետաքրքիր նախաձեռնություններ, որոնց իրականացմանը պետք է օժանդակել. «Արվեստ Հայաստան» հիմնադրամի գործադիր հիմնադիրներ Դավիթ և Ռաֆայել Նազարյանների նամակ-ուղերձը կազմակերպության շնորհանդեսի ժամանակ կարդաց գործադիր տնօրեն Անուշ Զեյնալյանը. hիմնադիրները շնորհանդեսին ներկայանալ չէին կարողացել:
Անուշ Զեյնալյանը, ներկայացնելով հիմնադրամի աշխատանքը, նշեց, որ իրենք խնդիր ունեն նպաստելու Հայաստանում ժամանակակից արվեստի զարգացմանը՝ օժանդակելով ոլորտում ստեղծագործող անհատներին, ինչպես նաև բացահայտելու նրանց ստեղծագործական ներուժը երկրի ներսում և դրա սահմաններից դուրս:
Անուշ Զեյնալյանը նշեց, որ իրենք արվեստագետներին պատրաստ են օգնել դրամաշնորհներով, ինչպես նաև՝ մշակութային և կրթական ծրագրերով, որոնցում ներգրավված են տեղացի և դրսի արվեստագետներ, համադրողներ, տեսաբաններ:
Խոսելով հիմնադրամի ընձեռած դրամաշնորհային հնարավորությունների մասին՝ նա նշեց, որ դրանց մրցույթին կարող են մասնակցել թվային և մեդիա արվեստի, լուսանկարչության, աուդիո-վիզուալ արվեստի, պերֆորմանսի և հանրային վայրերի արվեստների ներկայացուցիչները:
Գործադիր տնօրենն իր խոսքում նշեց, որ հիմնադրամում ներգրավված են մասնագետներ, որոնք կազմում եմ հիմնադրամի խորհրդատվական խորհուրդը: Նա հավելեց, որ իրենք շատ վստահում են խորհրդի անդամներին և կարևորում են նրանց խորհուրդները:
Ըստ հիմնադրամի ղեկավար մասի՝ իրենց դրամաշնորհային մրցույթներին կարող են մասնակցել հայաստանցի և սփյուռքահայ արվեստագետները: Առաջարկվող դրամաշնորհները կազմում են 4500 դոլարին համարժեք դրամ, չնայած տրամադրվող գումարը կարող է լինել բարձր կամ ցածր, քանի որ յուրաքանչյուր դեպքում արվեստագետը սահմանում է ակնկալվող գումարն ըստ նախագծերի:
Հիմնադրամի խորհրդատվական խորհրդի անդամներից «Անադիալ» պատկերասրահի և Երուսաղեմի Ալ-Մամալ հիմնադրամի հիմնադիր տնօրեն Ջեք Փերսեքյանն էլ նշեց, որ ինքը ուրախ է, որ ներգրավված է հիմնադրամի աշխատանքներում. փորձելու է փոխանակվել իր փորձով և կապել Հայաստանն ու աշխարհի այն հատվածը, որտեղ ինքն է ստեղծագործում:
Studio One