Հոլիվուդի Փառքի ծառուղում բացվել է դերասան Հյու Լորիի աստղը (լուսանկարներ, տեսանյութ)

Հոլիվուդի Փառքի ծառուղում բացվել է «Բժիշկ Հաուս» սերիալի շնորհիվ լայն ճանաչում ձեռք բերած բրիտանացի դերասան Հյու Լորիի անվանական աստղը, հայտնում է The Daily Mail-ը:

Պարբերականը նկատում է, որ շատ քիչ թվով բրիտանացի դերասաններ ու մշակութային գործիչներ են արժանացել Փառքի ծառուղում աստղ ունենալու պատվին:

Նշվում է, որ 57-ամյա Լորին աստղի բացման հանդիսավոր արարողության ժամանակ ասել է, որ կյանքում միշտ էլ հաջողակ է եղել:

Դերասանին շնորհավորելու է եկել բրիտանացի գրող Սթիվեն Ֆրայը, որը Լորիի հետ նկարահանվել է մի շարք հումորային սերիալներում:

«Նա իմ ճանաչած մարդկանցից ամենաբարին ու խելացին է»,-ասել է Ֆրայը:

Աղբյուրը մանրամասնում է, որ Հյու Լորին «Բժիշկ Հաուս» սերիալում Գրեգորի Հաուսի դերակատարման համար 2006 և 2007թթ. արժանացել է հեղինակավոր «Ոսկե գլոբուս» մրցանակի: Դրանից հետո նա համալրել  է ամենաբարձր վարձատրվող դերասանների շարքը: