Մինսկի դատարանն անփոփոխ է թողել Ալեքսանդր Լապշինին Ադրբեջան արտահանձնելու մասին որոշումը

Մինսկի քաղաքային դատարանը անփոփոխ է թողել Բելառուսի գլխավոր դատախազի տեղակալ Ալեքսեյ Ստուկի որոշումը Ռուսաստանի և Իսրայելի քաղաքացիություն ունեցող բլոգեր Ալեքսանդր Լապշինին Ադրբեջան արտահանձնելու մասին: 

Ինչպես հաղորդում է Dw.com-ը, Բելառուսի մայրաքաղաքային դատարանի որոշումը բաց ռեժիմով հայտարարվել է հունվարի 26-ին: Լապշինի բողոքը իրեն արտահանձնելու դատախազության որոշման մասին անփոփոխ է մնացել:

Բլոգերի պաշտպանությունը արդեն հայտարարել է, որ մտադիր է բողոքարկել այս որոշումը Գերագույն դատարանում:

Ալեքսանդր Լապշինին Մինսկում ձերբակալել են դեկտեմբերի 14-ին` Ադրբեջանի խնդրանքով, որը բլոգերի նկատմամբ միջազգային հետախուզում էր հայտարարել Լեռնային Ղարաբաղ այցելելու համար:

Իսրայելի ԱԳՆ-ն դիմել է Բելառուսի իշխանությունների` խնդրելով չարտահանձնել Լապշինին Ադրբեջան: Նման խնդրանքով Մինսկին դիմել է նաև ՌԴ ԱԳՆ-ն: