Մենք այսօր տարածաշրջանի ամենամարտունակ բանակը ունենք, որը փառքով պսակվեց նաև ապրիլյան պատերազմին. Էդիկ Մինասյան

12:42 • 27.01.17

Երևանի պետական համալսարանի պատմության ֆակուլտետի դեկան Էդիկ Մինասյանն այսօր՝ Հայոց բանակի տոնի նախօրեին հրավիրած ասուլիսին անդրադարձավ Հայոց ազգային բանակի կազմավորմանը և նշեց, որ այդ տարիներին հասկանալի էր, որ ազգային պետության անվտանգության և անկախության պահպանման միակ երաշխիքը կարող է լինել մարտունակ բանակը։

Ըստ նրա՝ Հայոց բանակի ակունքներում կանգնած էր Երևանի հատուկ գունդը, քաղաքների ինքնապաշտպանական վաշտերը։ Այնուհետև արդեն 1992-1993թթ. երկրապահ կամավորական ջոկատների և բանակ զորակոչված զինակոչիկների միավորմամբ ստեղծվեց շարժունակ և կարգապահ բանակ։  

«1992թ-ի հունվարի 28-ին կառավարությունն ընդունեց «ՀՀ պաշտպանության նախարարության մասին» պատմական որոշումը, ազդարարեց ազգային բանակի ստեղծման սկիզբը: Նոր կազմավորված զորամասերի անձնակազմը 1992թ. մայիսի 28-ին Հանրապետության հրապարակում հանդիսավոր պայմաններում տվեց առաջին զինվորական երդումը»,-ասաց նա:

Պատմաբանը հիշեցրեց, որ դեռևս 1991 թ. դեկտեմբերի 5-ին ՀՀ պաշտպանության առաջին նախարար էր նշանակվել Վազգեն Սարգսյանը։

Էդիկ Մինասյանը նշեց, թե Հայոց բանակը ստեղծվեց խորհրդային ռազմապաշտպանական հենքի վրա:

«Եթե Ադրբեջանը բռնագրավեց խորհրդային զենք-զինամթերքը, զինտեխնիկան, մենք խաղաղ ճանապարհով կարողացանք այս ամենին տիրանալ և ռազմական տեխնիկան ու ռազմատեխնիկական համալիրները կիրառել հայրենիք պաշտպանության համար»,-ասաց նա:

Նա նշեց, որ Հայաստան վերադարձան հարյուրավոր հայազգի սպաներ, որոնք մինչև այդ ծառայում էին խորհրդային բանակի տարբեր զորամիավորումներում, որոնց թվում էին գեներալներ Դալիբալթայանը, Հարությունյանը, Տեր-Գրիգորյանցը, Տեր-Թադևոսյանը՝ Կոմանդոս և շատ ուրիշներ։

Մինասյանը նշեց, որ Հայոց ազգային բանակի ստեղծման գործում մեծ եղան պաշտպանության նախարարներ Վազգեն Սարգսյանի, Վազգեն Մանուկյանի, Սերժ Սարգսյանի և այլոց դերերը:

«Չենք կարող պատկերացնել, թե ինչպիսին կլիներ Հայոց բանակը եթե չլիներ Վազգեն Սարգսյանը՝ պաշպանության առաջին նախարարը, ով մեծ դերակատարություն ունեցավ բանակի կայացման գործում, չմոռանանք նաև մյուս դերակատարումը»,-ասաց նա:

Էդիկ Մինասյանը նշեց, որ Հայոց բանակը մարտական փառահեղ ուղի անցավ և ոչ միայն հաղթանակով ավարտեց արցախյան պատերազմը, այլ համեմատական խաղաղ ստեղծագործ տարիներին պաշտպանության ոլորտն ուժեղացրեց:

«Մենք այսօր տարածաշրջանի ամենամարտունակ բանակը ունենք, որը փառքով պսակվեց նաև ապրիլյան պատերազմի ընթացքում»,-ասաց նա: