Իրավական առումով ՀՀ-ում անձնական տվյալների պաշտպանության խնդիրը լուծված է. Շուշան Դոյդոյան

23:26 • 28.01.17

Հունվարի 28-ն անձնական տվյալների պաշտպանության միջազգային օրն է: Հայաստանում անձնական տվյալների  պաշտպանության, իրավախախտումների և այլ հարցերի շուրջ Tert.am-ը զրուցեց ՀՀ ԱՆ Անձնական տվյալների պաշտպանության գործակալության պետ Շուշան Դոյդոյանի հետ:
 

-Տիկի՛ն Դոյդոյան, որքանով է ՀՀ քաղաքացիների անձնական տվյալների անվտանգությունը պաշպանված օրենքով սահմանված կարգով:

 

-2015 թվականի հուլիսի 1-ից ուժի մեջ մտած  «Անձնական տվյալների պաշտպանության մասին» ՀՀ օրենքը  լիարժեք ապահովում է ամբողջ  իրավական պաշտպանության համակարգը՝   և ՛սկզբունքները, և՛ կանոնները,  թե ինչպես պետք է   անձնական տվյալներ մշակողները, թե՛ մասնավոր, թե՛ պետական սեկտորում իրականացնեն  մարդկանց անձնական տվյալների մշակումը: Այսինքն, իրավական առումով ամբողջ խնդիրը փակված է: Իհարկե, առկա են  նաև վարչական պատասխանատվության նորմերը վարչական իրավախախտումների մասին օրենսգրքում, բայց այլ հարց է, թե որքանով են օրենքով սահմանված կառուցակարգերն իրականության մեջ կիրառվում: Այլ հարց է նաև այն, թե որքանով են դրանց հետևում անձնական տվյալներ մշակողները մի կողմից, քաղաքացիները՝ մյուս, որպեսզի իրենց անձնական տվյալները պատշաճ պաշտպանված լինեն:  

 

-Պետական սեկտորում հատկապես ո՞ր կառույցների կողմից է խախտվում  անձի անձնական տվյալների պաշտպանությունը:

-Իրականում այնքան բազմազան է, քանի որ խնդիրն առկա  է բոլոր ոլորտներում, չեմ  կարող մատնանշել մի ոլորտ,  որտեղ ավելի շատ են առկա խնդիրները, քան մեկ այլ ոլորտում; Եթե  փաստերով նայենք, ապա  անցյալ  տարի մեր հարուցած 11 վարչական վարույթներն առնչվում են բազմաթիվ ոլորտների, օրինակ` ոստիկանություն, քաղաքապետարան, դպրոցներ, ավիաուղիների, ֆոտոստուդիա, պետռեգիստր, և այլն։ Մենք չեն կարող մատնանշել, որ այս ոլորտի կառույցների կողմից ավելի բազմազան է, քան մյուսները։

 

Դրա համար սահմանել ենք առաջնահերթություններ՝  մեր գործունեության  առաջին երկու տարիների համար, 2015-2017։ Դրանք այն երեք հիմնական  հիմնախնդիրներ են, որոնց առավել շատ ուշադրություն ենք դարձնում մեր սկզբնավորման  օրվանից։ Դա տեսահսկման իրականացումն է թե՛ պետական, թե՛ մասնավոր սեկտորի կողմից, որպեսզի  տեսահսկումն իրականացվի օրենքով սահմանված կարգով, մյուսը անցանկալի հաղորդագրությունների խնդիրն է, որպեսզի օպերատորները չուղարկեն քաղաքացիներին առևտրային  բնույթի հաղորդագրություններ՝ առանց վերջիններիս համաձայնության, և երրորդը անչափահասների անձնական տվյալների պատշաճ վերահսկողությունն Է: 20 դպրոցներում տեսանկարահանման համար հարուցված վարչական վարույթներ էին հարուցվել, հստակ հանձնարարություն տվեցինք դպրոցների ղեկավարության, թե ինչպես իրականացնեն տեսանկարահանումը:

 

-2015-ից օրենքով պահպանվում է բոլոր տվյալները, սակայն նշեցինք մի շարք գերատեսչություններ, որոնք խախտում են օրենքը։ Օրենք կա, անձի իրավունքն էլի խախտվում է, ի՞նչ անել։

-Երկու հիմնական մեխանիզմի միջոցով մենք կարողանում ենք միջամտել, մեկը՝ երբ քաղաքացին, ում անձնական տվյալների պաշպանության իրավունքը խախտվել է  դիմում է մեզ, և մենք արդեն միջամտում ենք, մյուս տարբերակն իրականացվում է սեփական նախաձեռնությամբ:

Օրենքը նոր է, և մենք քայլ առ քայլ դաշտը մաքրելով առաջ կգնանք: