Սիրիացի օպերատորին թույլ չեն տվել մուտք գործել ԱՄՆ՝ «Օսկարին» մասնակցելու համար. AP

Լուսանկարը՝ TRT World-ի յութուբյան տեսանյութից

ԱՄՆ ներգաղթային իշխանությունները թույլ չեն տվել սիրիացի օպերատոր Խալիդ Խատիբի մուտքն ԱՄՆ, որն աշխատել է «Օսկար» մրցանակի ներկայացված «Սպիտակ սաղավարտներ» ֆիլմում, հայտնում է Associated Press գործակալությունը։

Ինչպես հաղորդվում է՝ ԱՄՆ ներքին անվտանգության նախարարությունը վերջին րոպեին արգելել է Խատիբի մուտքը երկիր։ Օպերատորը պետք է Լոս Անջելես մեկներ Ստամբուլից՝ Turkish Airlines ավիաընկերության օդանավով։

Սակայն Խատիբին մերժել են «վարկաբեկող բնույթի տեղեկության» հայտնաբերումից հետո։ Այս կատեգորիան, ինչպես նշում է գործակալությւնը, կարող է ներառել ինչպես տվյալ անձի ահաբեկչության հետ կապ ունենալու մասին տվյալներ, այնպես էլ անձնագրի հետ ունեցած խնդիրները։

40 րոպե տևողությամբ «Սպիտակ սաղավարտներ» ֆիլմը պատմում է Սիրիայում պատերազմի մասին։ Այն «Օսկարի» է ներկայացվել «Լավագույն կարճամետրաժ վավերագրական ֆիլմ» անվանակարգում։